Потрагата по кобрата која пред четири дена била забележана во близина на Тулуз продолжува и денес, но без успех, соопштија локалните власти.

Според префектурата на департманот Горна Гарона, отровната змија сè уште не е пронајдена, и покрај интензивната потрага во која учествуваат пожарникари, жандармерија и локална полиција, пренесува RTL.

Жителите претходно биле предупредени за присуство на кобрата, по што превентивно биле затворени паркови, гробишта и спортски терени во местото Кастелгинест и околината.

Локалните власти наведуваат дека змијата последен пат била видена во четврток навечер во близина на соседното место Сен Албан.

„Информациите со кои располагаме укажуваат дека овој вид кобра не бара контакт со луѓето. Таа се обидува да се скрие и се храни со помал плен“, изјавил заменик-префектот на департманот Дејвид Фолц, оценувајќи дека „реалната опасност е вознемирувањето на нејзината околина“.

Тој им препорачал на граѓаните, во случај на средба со змијата, полека да се оддалечат без нагли движења и веднаш да ги известат итните служби.

Во потрагата учествуваат околу петнаесет пожарникари опремени со дронови со термални камери, додека на терен се поставени и стапици за фаќање на рептилот.

Француските власти соопштија дека ќе биде покрената истрага за потеклото на животното, бидејќи држењето на овој вид змија е забрането во Франција.

Исчезнувањето на Александар Нешовиќ, познат како Баја, кој последен пат бил виден на 12 мај 2026 година во ресторан на Сењак, покрена обемна истрага и доведе до апсење на дури 10 лица. Приведени се осомничени за нападот, нивни помагачи, вработени во локалот, како и тројца полицајци и досегашниот началник на белградската полиција Веселин Милиќ. Вишото јавно обвинителство ја продолжува истрагата, додека судбината на Нешовиќ сè уште е непозната.

Според информациите, сè започнало во вторникот вечерта кога Нешовиќ, човек кој пред четири месеци на Сењак преживеал обид за убиство од платени убијци, пристигнал со својот црн бмв x7 пред угостителскиот објект „Ресторан 27“ на средба со познаници. Блиндираното возило го оставил пред самиот влез на локалот.

Околу 23 часот последен пат разговарал со својата невенчана сопруга Ј.М., на која ѝ потврдил дека е во ресторанот со пријатели, по што неговиот мобилен телефон бил исклучен и секој контакт прекинат.

Загрижена за неговата безбедност, Ј.М. на 13 мај вечерта официјално го пријавила неговото исчезнување.

Припадници на Управата на криминалистичката полиција и Вишото јавно обвинителство веднаш реагирале и околу 21:30 часот влегле во ресторанот.

Таму ги дочекала вознемирувачка сцена – форензичарите пронашле две испукани чаури од калибар 9 милиметри и повеќе траги од крв, за кои постои сомнеж дека му припаѓаат на Нешовиќ.

Увидот продолжил и доцна вечерта на 14 мај, кога истражителите со специјална течност барале траги од крв кои, според сомнежите, некој се обидел да ги отстрани. Во контејнер спроти локалот бил пронајден и отфрлен ајфон од засега непознат сопственик.

Истрагата брзо дала резултати и кругот на осомничени се проширил. Поради сомневање за обид за тешко убиство, недозволено поседување оружје и предизвикување општа опасност, приведени се С.В. и М.С.

Во текот на реконструкцијата на бегството и злосторството, полицијата открила и логистичка мрежа на лица за кои постои сомнеж дека им помагале на сторителите.

Уапсена е и Д.В., сопруга на осомничениот С.В., под сомнение дека од таен „штек“ го донела пиштолот од кој било пукано кон Нешовиќ.

Поради непријавување на злосторството и помагање на сторителите, зад решетки завршиле и сопственикот на ресторанот Н.Л. (50), како и келнерот С.В., кој таа вечер работел во локалот.

Уапсен е и Д.С. (51), кој се сомничи дека по пукањето ги одвел С.В. и М.С. во Јаково. При неговото апсење, полицијата кај него пронашла пасоши и 10.000 евра.

Американскиот претседател Доналд Трамп денеска изјави дека неговата претстојна одлука за понатамошната продажба на оружје на Тајван е ефикасно средство за притисок врз Пекинг, јавува ДПА.

Трамп рече дека засега го остава договорот за продажба на оружје, вреден 14 милијарди долари, да лебди во воздух, иако тој е веќе одобрен од американскиот Конгрес, пренесе германската агенција.

„Зависи од Кина“, изјави Трамп за радиодифузерот „Фокс Њуз“. „Искрено, тоа е многу добра преговарачка алатка за нас. Тоа е многу оружје“, рече тој.

Трамп претходно,во авион на враќање од Пекинг за САД, изјави дека одлуката ќе ја донесе во блиска иднина. Тој, додаде, дека за ова прашање прво мора да разговара со Тајван.

Американскиот Конгрес однапред го одобри најновиот договор за оружје со Тајван во јануари 2025 година.

Кина ги отфрла таквите продажби на оружје затоа што Тајван го смета за свој неделив дел, иако оваа островска република има независна и демократска влада, појасни ДПА.

Тајван никогаш не бил дел од комунистичка Народна Република основана во 1949 година. Меѓутоа, Кина сака да го присвои Тајван, а Пекинг веќе се закани дека ќе употреби и воена сила доколку тоа не се случи со мирни средства.

САД долго време ги поддржуваат напорите на Тајван за модернизација на своите вооружени сили и зајакнување на своите одбранбени капацитети, потсетува ДПА.