Софија очекува меѓу 300.000 и 400.000 посетители за време на одржувањето на Евровизија 2027, изјави општинскиот советник Димитар Петров за Радио Софија.

Според него, Евровизија не е само концерт или фестивал што трае неколку дена, туку претставува „град во градот“, кој привлекува огромен број посетители и бара сериозна организација, особено во делот на безбедноста.

Петров истакна дека Софија ги исполнува сите потребни услови за домаќин на натпреварот, посочувајќи ги меѓународниот аеродром, директните авиолинии и сместувачките капацитети.

Тој предупреди и на појавата на екстремно високи цени за сместување по победата на Дара. Како пример наведе огласи во кои двособни станови во Софија се нудат за 10.000 до 13.000 евра за една недела.

„Тоа не смееме да го дозволиме. Мора да има понуда за сите посетители“, рече Петров, додавајќи дека државата и градот треба да преземат мерки за да спречат нереално поскапување.

Тој потсети и дека во 2027 година Бугарија ќе одбележи 20 години од членството во Европската Унија и оцени дека и овој јубилеј треба да се искористи за меѓународна промоција на земјата.

Европската комисија (ЕК) ќе предложи покренување постапка за прекумерен дефицит против Бугарија откако ќе се утврди дека земјата не ги исполнува фискалните критериуми на Европската Унија, потврди европскиот комесар за економија, Валдис Домбровскис.

Зборувајќи по состанокот на Советот за економски и финансиски прашања (ЕКОФИН) во Луксембург, Домбровскис изјави дека Комисијата ја проценила буџетската состојба на неколку земји-членки и заклучила дека Бугарија не ги исполнува пропишаните барања во врска со буџетскиот дефицит, објавува денес порталот „Новините“.

Според правилата на ЕУ, постапката за прекумерен дефицит може да се покрене кога буџетскиот дефицит на државата надминува три проценти од бруто домашниот производ, додека јавниот долг надминува 60 проценти од БДП.

Како дел од постапката, на земјата ѝ се дава рок за спроведување мерки што би го вратиле дефицитот во дозволените граници.

Доколку државата не ги почитува препораките, може да се воведат финансиски санкции.

Предлогот на Европската комисија сега треба да го разгледаат земјите-членки на ЕУ како дел од понатамошната постапка.

Властите во јужниот дел на Холандија издадоа тридневно предупредување за околу 200.000 жители, откако бактеријата Ешерихија коли била откриена во водата за пиење.

Предупредувањето се однесува на жителите на градовите Дордрехт, Звајндрехт и Хендрик-Идо-Амбахт, што предизвика недостиг од флаширана вода во супермаркетите.

Надлежните соопштија дека целата вода од чешма мора да се преврива најмалку три минути пред да се користи за пиење, готвење или миење заби. Мерката има за цел да ги уништи сите бактерии што можеби навлегле во водоводниот систем преку дистрибутивната мрежа.

Предупредувањето ќе остане во сила сѐ додека анализите не потврдат дека водата повторно е безбедна за употреба без дополнителен третман.

Ешерихија коли е бактерија која природно се наоѓа во цревата на луѓето и животните, но кога ќе се појави во загадена храна или вода може да предизвика стомачни и цревни заболувања. Здравствените власти предупредија дека лицата со ослабен имунитет можат сериозно да се разболат.

По објавувањето на предупредувањето, побарувачката за флаширана вода нагло се зголемила. Во најмалку еден супермаркет во Дордрехт сите резерви биле распродадени за само 45 минути, додека и други продавници пријавиле недостиг поради панично купување.