Три лица загинаа во израелски воздушен напад врз јужните предградија на Бејрут, втор таков напад во изминатата недела. Израел соопшти дека акцијата е одговор на ракетните напади на Хезболах врз негова територија.

Премиерот Бенјамин Нетанјаху изјави дека Израел нема да толерира напади врз својата територија, додека армијата соопшти дека прецизно погодила инфраструктурен објект на Хезболах во населбата Дахија.

По нападот, Иран ги обвини САД дека не ги исполнуваат своите обврски и порача дека е бесмислено да продолжат разговорите доколку нема напредок. Новата ескалација може дополнително да ги загрози напорите за постигнување мировен договор на Блискиот Исток.

По нов израелски напад врз јужните предградија на Бејрут, еден од водечките ирански политички функционери упати остри критики кон САД, обвинувајќи ги дека немаат ниту волја ниту капацитет да ги исполнат своите обврски и дека со Израел играат стратегија на „добар и лош полицаец“.

Претседателот на иранскиот парламент, Мохамад-Багер Галибаф, на платформата X изјави дека најновиот напад во областа Дахија уште еднаш покажува дека Вашингтон не го спречува дејствувањето на Израел. Тој додаде дека преку дозволување на такви напади не може да се постигнат никакви политички отстапки.

„Играта на добар и лош полицаец е застарена. Ако немате волја и капацитет да ги исполните обврските, не може да се зборува за продолжување на процесот“, порача Галибаф.

Во меѓувреме, според дипломатски извори, прашањето на Либан станува дополнителна точка на несогласување во пошироките разговори. САД наводно се обиделе Либан да остане надвор од евентуален договор за завршување на конфликтот, додека Иран инсистира земјата да биде вклучена, со цел да се сопрат израелските напади врз Хезболах.

Иранските воени структури исто така реагираа на нападите, најавувајќи дека тие „нема да останат без одговор“. Од друга страна, американскиот медиумски портал Aксиос објави дека Израел непосредно пред нападот ја информирал американската војска во регионот.

Три лица загинаа, а едно се води како исчезнато по судир на катамаран и едрилица во морето меѓу островите Шолта и Брач, во близина на Сплит.

Несреќата се случила денес околу 11:38 часот во Сплитските врати, кога дошло до директен судир меѓу патнички катамаран и едрилица, која потоа потонала.

На катамаранот имало 118 патници и седум членови на екипажот и сите се неповредени. На едрилицата имало осум лица. Дел од нив биле извлечени од морето и спасени, додека за едно лице сè уште се трага.

Во спасувачката акција се вклучени поморската полиција, крајбрежната стража, итната медицинска помош и други служби, а од воздух помага и хеликоптер. Акцијата ја координира Националната централа за спасување на море во Риека.

Катамаранот „Krilo Eclipse“ пловел на редовна линија кон Брач.

Причините за несреќата засега не се познати, а истрагата е во тек.