Пет тинејџери загинаа во Ирска снимајќи се како возат во спротивна насока на автопат

Пет тинејџери на возраст од 15 до 18 години загинаа во тешка сообраќајна несреќа во Ирска, откако со украден автомобил се возеле во спротивна насока на автопат, додека го снимале своето опасно возење.

Несреќата се случила на автопат во округот Килдер, југозападно од Даблин. Петте момчиња биле во украдено БМВ кога се судриле со возило од спротивен правец, во кое се превезувале четири члена на едно семејство. Тие се тешко повредени.

Според информациите, тинејџерите во изминатите денови ги „тероризирале“ локалните жители со провали и кражби на автомобили. Често објавувале видеа од своето опасно однесување и моменти кога ги бркала полицијата.

Едно од видеата објавено пред трагичната несреќа го прикажува ретровизорот на автомобилот, а видеото е проследено со зборовите „погрешен пат“.

Автомобилот во кој се превезувале бил украден претходната ноќ и бил забележан во неколку области во близина на Килдер пред да се случи несреќата.

Трагичниот случај повторно го отвори прашањето за опасниот тренд на објавување видеа од диво и ризично возење на „Тик-ток“ и други социјални платформи, пишува „Гардијан“.

Потрагата по возбуда и восхит од врсниците преку ваквото однесување не е нова, но социјалните мрежи дополнително го засилуваат феноменот, смета Мери Ајкен, професорка по форензичка киберпсихологија на Универзитетот во Источен Лондон.

„Би го опишала како хибридно однесување. Додека возат, тие истовремено снимаат содржина за подоцнежно објавување или емитување во живо. Тие имаат една нога во реалниот свет, а другата во киберпросторот. Размислуваат само за лајковите и како ќе изгледаат нивните лица“, вели Ајкен.

Таа додава дека ваквиот виртуелен простор психолошки го преокупира човекот и може да го зголеми преземањето ризик, како и занемарувањето на последиците од сопственото однесување.

Минатата недела на „Тик-ток“ повторно се појавиле видеа од опасно возење, што предизвикало нови критики кон платформата. Компанијата одбила покана да се појави пред медиумскиот комитет на ирскиот парламент. Претседателот на одборот, Алан Кели, одлуката ја нарекол „шлаканица“ за ирската јавност.

Во меѓувреме, дел од политичарите бараат построги казни, вклучително и возењето во спротивна насока на автопат да се класифицира како обид за убиство.

Случајот повторно го актуелизира и прашањето за овластувањата на полицијата. Нејзини претставници велат дека полицајците можат да се обидат да ги запрат ваквите возачи, но дека одговорноста не е само на полицијата. Според нив, целото општество – родителите, наставниците и социјалните работници – мора да се вклучи за да се спречи младите со проблеми во однесувањето да продолжат по опасен пат.