Тројца Албанци се уапсени за убиството на службеникот на граничната полиција на Црна Гора, Милутин Лековиќ, кој почина во неделата како последица од ранувањето во Игало откако лекарите со часови се обидувале да му го спасат животот, пренесува „Спутник“.

На Лековиќ со пиштол во глава му пукале од задното седиште на службениот автомобил осомничените што тој претходно ги привел, пишуваат црногорски „Вијести“.

„Денес околу 14.45 часот по притворањето три лица кои не поседувале лични документи, едно од нив од својот пиштол му пукало во главата на службеникот М. Л. Напаѓачите, двајца мажи и една жена, по нападот избегале во непознат правец“, соопшти полицијата.

Напаѓачите попладнето биле уапсени во обид пешки да ја премина границата со Хрватска. Кога полицијата ги опколила, осомничениот за убиството на Лековиќ повторно пукал и бил ранет во размената на оган.

Осомничениот е државјанин на Албанија, Луан Хасани (43), баран во Албанија за убиство со умисла и обид за убиство и поседување огнено оружје и муниција. Нему му е одредена мерка затор. Со него во моментот на убиството биле и Љуљзим Хасани (49), баран во Албанија за убиство со умисла и поседување огнено оружје и муниција, како и Нура Хасани (67) барана во Албанија од 2018 година поради закани.

Лицата најверојатно се од Коплик, Албанија, иако тие тврдат дека се од Косово.

Во градот Добој во БиХ викендов се случила страотна сообраќајка во која пешак со многу среќа успеа да се спаси од фатални повреди.

На снимките кои ги објави порталот „MojДобој.инфо“, се гледа пешакот кој оди по тротоар додека од далеку се приближува едно возило.

Во рок од неколку секунди по тој автомобил се појавува уште еден, обидувајќи се да го претекне. Во истиот момент, првото возило се обидува да сврти лево и тогаш се случува страшна сообраќајка, која пешакот го заобиколува за само неколку чекори.

Хрватски „Индекс“, повикувајќи се на информации од локалните портали, пренесува дека во едно од оштетените возила било и дете, но дека во инцидентот нема сериозно повредени.

Во Хрватска лица над 65-годишна возраст, кои немаат никаков приход, а можеби ни имот, треба да добиваат 800 куни (околу 107 евра) национална пензија месечно од 2021 година. Хрватското Министерство за труд и пензискиот систем забрзано работат на донесување нов закон за националните пензии за што во текот на оваа недела треба да се изјасни работна група составена од експерти, социјални партнери и здруженија на пензионери.

За време на последната парламентарна изборна кампања ХДЗ вети воведување национална пензија, а според државниот секретар Мајда Буриќ, предлог-законот треба да биде во владина процедура уште во јануари или февруари.

За да добие право на државна пензија на Хрватска, лицето на возраст од 65 години мора да живее во земјата од 45-годишна возраст. Националната пензија би изнесувала 800 куни месечно и во зависност од критериумите, на неа може да сметаат помеѓу 8.000 и 22.000 граѓани од Хрватска што немаат друг приход.