Сите вакцини, дури и оние кои не се одобрени од Европската агенција за лекови, ќе бидат признати од Грција за влез, објави „Катимерини“, повикувајќи се на претставник на здравствената комисија, кој ја советува владата за прашања поврзани со пандемијата.

Вана Папаевангелу рече дека одлуката е донесена по препорака на комисијата. Вакцините што ќе бидат признаени се Новавакс, Синовак, Спутник V, Синофарм и КанСино.

Папаевангелу истакна дека туристите ќе можат да влегуваат во Грција преку копнените граници, а упатствата за хотели и бродови ќе бидат дополнети со тоа што ќе се бара вработените да бидат вакцинирани или тестирани за коронавирус секоја недела.

Таа истакна дека 98 проценти од смртните случаи во изминатата недела се случиле кај луѓе кои не биле вакцинирани.

Европската служба за надворешни работи соопшти дека во вторник, 15 јуни, ќе се одржи состанок во рамките на дијалогот меѓу Белград и Приштина.

Предвидено е состанокот да започне околу 08:30 часот и да заврши до 12:30 часот.

ЕЕАС наведува дека медијатор на состанокот ќе биде шефот на дипломатијата на ЕУ, Жосеп Борел, со помош на специјалниот претставник на ЕУ, Мирослав Лајчак.

Се очекува учесниците во дијалогот, претседателот на Србија, Александар Вучиќ и премиерот на Косово, Албин Курти, да се обратат пред медиумите по разговорите во Брисел.

Црногорските здравствени власти добија донација од 10.000 дози од вакцината на „Астра зенека“ од Хрватска.

Амбасадорот Томислав Павковиќ рече дека тоа е израз на солидарност кон сите граѓани на Црна Гора, што е една од основните европски вредности што Хрватска сака да ја промовира.

Хрватската влада претходно донесе одлука да донира 50.000 дози вакцини од „Астра зенека“ на Црна Гора, Босна и Херцеговина и на Косово.

Црна Гора досега вакцинираше скоро 250.000 лица, а скоро половина од нив се целосно имунизирани со две дози на вакцина.