Нов земјотрес со јачина од 4,1 степен според Рихтеровата скала денеска околу 13 часот ја погоди областа на Петриња.

Ова е 26. земјотрес што се почувствува во Хрватска во последните три дена, пишува порталот „Индекс“, а земјотресот бил почувствуван и во БиХ, јавуваат тамошните медиуми.

Земјотресот траел околу пет секунди.

ЕМСЦ прво извести дека магнитудата била 3,7 степени според Рихтеровата скала, а потоа ја поправиле на 4,1.

Хрватската сеизмолошка служба исто така потврди дека земјотресот бил со јачина од 4,1 степен според Рихтеровата скала.

Инаку, во текот на минатата ноќ, областа Петриња се тресеше дури девет пати, а најсилниот удар беше 3,2 степени според Рихтер.

Во последните 24 часа, во Хрватска се регистрирани 715 нови случаи на коронавирус, а 33 лица починаа, објави Националниот штаб за цивилна заштита.

Бројот на активни случаи во Хрватска е 4.653. Меѓу нив, 1.855 пациенти се во болница, од кои 160 се на апарати за дишење.

Од 25 февруари 2020 година, кога е регистриран првиот случај на инфекција во Хрватска, досега се евидентирани вкупно 223.812 лица заразени со коронавирус, од кои 4.550 починале.

Вкупно оздравеле 214.609 луѓе, од кои 1.239 во последните 24 часа.

До денес, тестирани се вкупно 1.107.887 лица, од кои 5.335 во последните 24 часа, според Националниот штаб за цивилна заштита.

Првите количини на кинеската вакцина против коронавирусот на компанијата „Синофарм“ ќе пристигнат утре во Србија, објавија повеќе српски медиуми.

„Новости“ пишува дека Агенцијата за лекови и медицински помагала (АЛИМС) сè уште нема издадено дозвола за употреба на кинеската вакцина, но се очекува наскоро да биде дадена.

Најверојатно в недела со кинеската вакцина ќе почне имунизацијата на здравствените работници кои изјавија дека сакаат да се вакцинираат.

Во Србија во тек е имунизација со вакцината на Бионтек/Фајзер и со руската вакцина „Спутник 5“.