Српската министерка за трговија, туризам и телекомуникации Татјана Матиќ изјави за телевизијата К1 дека граѓаните на Србија ќе можат да патуваат во Грција под одредени услови од 14 мај, преку Северна Македонија.

Таа рече дека кон средината на овој месец ќе може да се влезе во Грција преку Бугарија, со, како што вели, потврда за вакцинација или негативен тест.

„Работиме на тоа оние кои ќе патуваат на море да можат да се пријават за вакцинација преку туристичките агенции“, рече Тајтана Матиќ, додавајќи дека се чини оти српските граѓани ќе можат да патуваат и во Хрватска и Турција.

Претходно, министрите за туризам на Србија и Грција, Татјана Матиќ и Харис Теохарис, се согласија дека српските граѓани годинава ќе можат да го поминат летниот одмор во Грција, потврдувајќи дека биле вакцинирани со каква било вакцина или со негативен ПЦР или брз тест. Границите за српските туристи најверојатно ќе бидат отворени веќе во средината на април, иако сезоната официјално започнува на 14 мај.

Како што претходно беше прецизирано, граѓаните кои се вакцинирани и кои се упатуваат кон Грција ќе бидат насочени кон зелената лента на границата, што би го намалило метежот.

Имињата на сите 240 пратеници во 45-от Парламент на Бугарија се веќе јасни, како и распределбата на местата. Ова го објави Централната изборна комисија на последната прес-конференција по изборите.

Коалицијата ГЕРБ-СДС има 75 места, „Има таков народ“ со 51 и БСП со 43 пратеници, ДПС со 30, „Демократска Бугарија“ со 27 и „Стани! Излези!“ со 14.

Досега 14 кандидати се откажаа од мандатот во бугарскиот Парламент, меѓу кои и премиерот и лидер на ГЕРБ, Бојко Борисов.

Централната изборна комисија соопшти ќе го анализира изборниот процес, по што ќе достави извештај до Националното собрание со предлози за измени во изборното законодавство. Се очекува, бугарскиот претседател, Румен Радев, да ја свика конститутивната седница во текот на следната недела.

Во мај ќе имаме колективен имунитет, изјави бугарскиот премиер, Бојко Борисов.

„Вакцините ќе ги добиеме во мај и до средината на јуни. Првично мислевме дека тоа ќе се случи во август, но убеден сум дека веќе во мај, со 3 милиони вакцинирани, ќе имаме колективен имунитет“, рече Борисов.

Тој истакна дека благодарение на европската солидарност и нивната брза дипломатска акција, успеале да обезбедат 2,7 милиони дози од вакцината „Фајзер“ да бидат испорачани во Бугарија во следните два месеци, јави БГНЕС.

Борисов изрази уверување дека зголемениот број на вакцинирани и излекувани ќе придонесе Бугарија да ја надмине пандемијата.

Пред една недела беше соопштено дека Бугарија ќе добие повеќе од 1,2 милиони „солидарни вакцини“ против Ковид-19 од „Бионтек“ и „Фајзер“ во второто тромесечје. Повеќето земји членки на ЕУ се согласија заеднички да споделат дел од дополнителните 10 милиони дози со Бугарија, Хрватска, Естонија, Летонија и Словачка – земји за кои е заклучено дека им се потребни најмногу вакцини.