Косовската канцеларија на Организацијата за безбедност и соработка во Европа (ОБСЕ) објави план од девет точки за деескалација на тензиите на северот на Косово и враќање на двете страни на преговарачка маса за нормализирање на односите во услови на намалена доверба во ЕУ, пренесува „Еурактив“.

Планот има за цел постигнување траен мир и стабилност на северот од Косово и враќање на косовските Срби во тамошните демократски институции и процеси.

ОБСЕ прво ги повикува Косово и Србија да ја потврдат својата посветеност на претходните договори направени како дел од тековниот дијалог предводен од ЕУ, вклучително и Охридскиот протокол.

Интересно е инсистирањето на договорите со оглед на тоа дека Косово сè уште не ја формираше Заедницата на српските општини (ЗСО), за која вели дека е неуставна, а Србија продолжува да лобира против признавањето на Косово и неговото членство во меѓународните организации и да се меша во косовските избори.

Второ, Косово треба да ги повлече специјалните полициски сили кои беа присутни во регионот за да го одржуваат редот, а Србија треба да ја намали борбената готовност на вооружените сили, кои беа ставени во готовност пред десет дена.

Трето, на косовската полиција, заедно со силите на КФОР и ЕУЛЕКС, треба да ѝ се овозможи целосно да се грижи за редот и безбедноста на земјата.

Под четврто, ОБСЕ бара да се прекинат протестите за општинските служби да се стават во функција за нормално функционирање на општествениот живот, а во исто време, на вработените треба да им се овозможи пристап до општините.

Во точка пет се вели дека неодамна избраните албански градоначалници треба да поднесат оставки до летово, со што се отвора патот за предвремени општински избори, кои, според точката шест, треба да се одржат годинава.

Во седмата точка се посочува дека ОБСЕ ќе го поддржи изборниот процес преку техничка поддршка на косовските власти кои ќе ги организираат изборите, зајакнувајќи го легитимитетот и довербата меѓу заедниците.

Според точка осум, ОБСЕ ќе ги ангажира младите во програмите и процесите за помирување, а според точка девет, ОБСЕ ќе го поддржи спроведувањето на договорените одредби во рамките на тековниот дијалог.

Ова е првиот формален и јавно достапен акционен план за да се поправи ситуацијата на северот од Косово.

Поранешната министерка за надворешни работи, Мелиза Харадинај неодамна изјави дека ЕУ го изгубила својот кредибилитет и дека САД треба да го преземат водството во тековниот дијалог со Србија.

Харадинај отиде дотаму што сугерираше дека Косово треба да направи стратешка ревизија на своето учество во дијалогот со ЕУ и на тоа како ЕУ го третира Косово во споредба со Србија.

„Косово не треба да биде заложник поради структурните и политичките прашања на ЕУ за да се постигне траен мир и взаемно признавање. Веќе не гледам смисла Косово да учествува во дијалогот предводен од ЕУ, така што ова може да се постигне со посредство на САД бидејќи САД ги признаваат и Косово и Србија како држави и тоа се непристрасни“, истакна таа.

Радован Јурачиќ (44) од Србија исчезна минатиот понеделник во Грција кога наводно се качил на патнички брод, кој од Пиреја одел кон островот Кос, по што му се губи секаква трага. Потрагата по него трае цели седум дена, а сѐ уште нема информации каде се наоѓа и што се случило кобниот ден.

Радован Јурачиќ од Кикинда, татко на две деца, отишол на грчкиот остров Кос кај својот кум со намера да се договори за сезонска работа и да заработи во текот на летото.

Минатиот понеделник околу 18 часот се качи на траектот во Атина. Два часа подоцна, околу 20 часот, разговарал со сопругата Драгана, на која ѝ кажал дека се качува на траектот за Кос.

Неговата сопруга Драгана Јурачиќ претходно за „Нова.рс“ истакна дека повикот бил прекинат бидејќи врската била лоша и дека нејзиниот сопруг оттогаш не се јавил.

„Му се јавив во вторникот околу 7 часот, но тој не ми одговори, а некаде околу 12 часот телефонот се исклучи и веќе нема сигнал. Последен пат беше лоциран на Родос“, рекла тогаш таа.

Семејството и голем број пријатели на исчезнатиот Радован постојано апелираат до сите лица, доколку имаат информации за него, веднаш да пријават.

Посебен акцент е ставен на островите Патмос, Лерос, Калимнос, Кос и Родос, тоа се островите на кои се закотвувал бродот со кој патувал Радован.

Неговите пријатели не знаат што можело да тргне наопаку или што се случило кобниот ден.

„Сѐ оди многу бавно, иако секоја минута е многу важна. Не знаеме што се случило и само сакаме да го најдеме”, рекол познајник на семејството.

Според досегашните информации, семејството на исчезнатиот Радован е во контакт со српската амбасада во Атина.

„Им беше кажано дека сѐ уште не ги одобриле сите барања од бродските компании за преглед на камерите и телефонските записи“, соопштија од групата на која беа објавени првите информации за исчезнувањето на Радован.

Специјалниот претставник на ЕУ за дијалог меѓу Белград и Приштина, Мирослав Лајчак, денеска изјави дека е длабоко загрижен за ситуацијата на северот од Косово и повторно повика на смиреност, предвремени избори и враќање на дијалогот меѓу двете страни.

Лајчак синоќа заедно со американскиот претставник за Западен Балкан, Габриел Ескобар, разговараше со косовскиот премиер Аљбин Курти и со првиот вицепремиер, Бесник Бисљими.

„Ние сме длабоко загрижени за ситуацијата на северот и повикуваме на итна деескалација на теренот, предвремени избори со учество на косовските Срби и враќање на дијалогот за нормализација на односите“, напиша Лајчак на „Твитер“.

На средбата со европските и американските емисари Курти изразил безрезервна подготвеност и непоколеблива добра волја за интензивен и заеднички ангажман за деескалација на ситуацијата и нормализација на односите, соопшти претходно денеска косовската влада.

Како што се наведува во соопштението на владата на Косово, на средбата биле разменети мислења за состојбите и последните случувања, идеи за деескалација на северот и итноста од спроведување на основниот договор и на анексот за имплементација.

Лајчак и Ескобар на косовскиот премиер му претставија предлог од три точки за излез од кризата на северот од Косово, првата е деескалација на ситуацијата, втората е брзи избори на север и третата е враќање на дијалогот за нормализација.