Австрија ќе обезбеди милион дози вакцини против Ковид-19 за земјите од Западен Балкан, покрај дозите што веќе ги испраќа во регионот во име на Европската унија, изјави австрискиот канцелар, Себастијан Курц.

Курц ова го објави по самитот со колегите од земјите од поранешна Југославија, кои не се членки на Европската унија. На состанокот беше присутен и претставник од Албанија.

Австрија на Балканот дистрибуира 651.000 дози вакцини од ЕУ.

„Покрај тоа, сакаме да дадеме билатерален придонес како Република Австрија и решивме како Влада да обезбедиме еден милион дози вакцини за земјите од Западен Балкан“, рече Курц пред новинарите по самитот.

Дозите ќе се доставуваат од август до крајот на годината, посочи тој, без да прецизира кои земји ќе ги добијат или како ќе се распределат меѓу нив.

Тој исто така не кажа кој вид на вакцина ќе биде доставена.

Европските дози на вакцини од „Фајзер“ и „Бионтек“ што Австрија ги испраќа во земјите од Западен Балкан во април беа распределени по потреба.

Босна и Херцеговина доби најмногу, а следеа Албанија и Македонија.

Претседавачот со Претседателството на Босна и Херцеговина, Милорад Додик, изјави дека одлуката на Парламентот на Црна Гора за резолуцијата за Сребренаница е непријателски чин.

Според него, несфатливо е црногорскиот парламент да донесе резолуција за Сребреница без таа да биде изгласана во БиХ.

„Ако Собранието на БиХ не донело сличен документ, тогаш се поставува прашањето зошто тоа го стори Црна Гора, и прашањето е дали станува збор за акт на мешање во внатрешните работи. Ако политиката на БиХ не можела да постигне консензус за тоа прашање, како е можно тие да имаат право да зборуваат за тоа“, рече Додик.

Парламентот на Црна Гора не докажа ништо во врска со Сребреница, додаде тој, но докажа дека е против Србите.

Во последните 24 часа во Хрватска се потврдени 113 нови случаи на коронавирус, тројца пациенти починаа, а бројот на активни случаи е 700.

Меѓу нив, 313 пациенти се лекуваат во болница, од кои 25 се на апарати за дишење.

Од 25 февруари 2020 година, кога е регистриран првиот случај на коронавирус во Хрватска, регистрирани се вкупно 359.031 заразени, од кои 8.168 починале, а оздравеле 350.163 лица.