Во Босна и Херцеговина секоја година прерано умираат околу 3 300 луѓе како последица на изложеноста на воздух загаден со честички PM 2.5 , додека речиси една од секоја десетта смртност годишно во БиХ е резултат на загадувањето на воздухот. Ова се наведува во најновиот извештај за загаденоста на воздухот во Босна и Херцеговина којшто го објави Светската банка.

Во него се предупредува дека овие податоци се двојно поголеми во споредба со Северна Македонија, а четири пати во однос на Косово. Економските трошоци, како што се наведува во извештајот, изнесуваат во просек 1,38 милијарди долари, што е еквивалент на 8,2 проценти БДП од 2016 година.

Во извештајот се напоменува дека ефективното решавање на проблемот со загадувањето на воздухот бара стретешки, интегрирани решенија прилагодени на конкретниот град, односно област.

Жителите на голем број босански градови веќе со недели се гушат од загаден воздух, што содржи големо количество честички прашина и отровни гасови. Во извештајот на СБ посебно се истакнува проблемот со честичките прашина ПМ 2.5, кои продираат длабоко во системот за дишење предизвикувајќи болести на срцето и белите дробови, како и мозочни удари и тумори.

Според Светска здравствена организација концентрацијата на ПМ 2.5 не смее да биде поголема од 10 микрограми на метар квадратен, но во БиХ таа вредност е неколку пати поголема.Само во Сараево во текот на месецот забележани се и концентрации и до 500 микрограма честици ПМ 2.5 на метар квадратен.

Како последица на загадениот воздух со ПМ 2.5 секоја година во БиХ прерано умираат 3.300 луѓе. Од таа бројка околу 16 отсто смртни случаи се однесуваат на лицата кои живеат на подрачјето на Сараево и на Бања Лука, се наведува во извештајот.

Косовската Движење Самоопределување, со писмо упатено до претседателот на Косово, Хашим Тачи, како и што се претпоставуваше, за иден мандатар на косовската влада го предложи претседатлот на оваа партија, Албин Курти, пренесуваат косовските медиуми.

Предлогот за иден премиер е доставен и покрај застојот во преговорите за коалиција меѓу Самоопределување и ЛДК – партиите што победија на октомвриските избори и кои сè уште не успеваат да пронајдат заедничко решение за формирање влада.

Косовскиот претседател Хашим Тачи, по официјалното прогласување на резултатоите од октомвриските избори, во повеќе наврати го повика Курти да му предложи мандатар од неговата партија за Тачи со формален декрет да го прогласи за одговорен за предлагање на идната влада на Косово.

На денешното именување му претходеше вчерашната најава од Тачи дека би можел самоиницијативно да го прогласи Курти за мандатар на идната косовска влада.

Од моментот на преземање на мандатот, Курти ќе има рок од 15 дена да го предложи во собранието составот на новата влада. Составот на владата мора да биде одобрен од 61 пратеник, пренесува порталот „Кос сев“.

Автобус „се изгубил“ десет пати на патот, патниците патувале осум часа од Сплит до Загреб. Во ваква неверојатна ситуација се нашле патниците на „Кроација бус“, кои од Сплит тргнале изутрината во 4.30 часот. Тие требало да бидат во Загреб по 9 часот, но нивното патување се одложило до недоглед.

„Во 9.40 часот требаше да пристигнеме на нашата дестинација, а ние бевме на 300 километри од Загреб. Возачите имаат неодговорен и незаинтересиран однос кон работата. Најлошо од сè, тие дури и не си помагаа едни на други во решавањето на проблемите. Тие досега нè шетаа најмалку 10 пати, им напишал еден од патниците на надлежните во компанијата за превоз.
Како што пренесува „Слободна Далмација“, проблемите почнале на патувањето поради невремето што предизвикало затворање на автопатот А1 кај Свети Рок и Поседарје.

Автобусите биле испратени по други патишта, каде што залутале на јадранската магистрала кон
Карлобаг. Но, и таму биле информирани дека патиштата се затворени по што почнале да се враќаат назад.