На денешната вонредна седница, Парламентот на Црна Гора повторно гласаше со мнозинство гласови за изменување и дополнување на Законот за слобода на вероисповед. За измените и дополнувањата на Законот за вероисповед гласале 41 пратеник од парламентарното мнозинство, без гласови против и воздржани.

Парламентот усвои и други закони што црногорскиот претседател Мило Ѓукановиќ претходно одби да ги потпише и ги врати на повторно изјаснување.

Пакетот закони првпат беше усвоен на седницата на Собранието на крајот на декември минатата година.

Неколку десетици граѓани со знамиња на Црна Гора и НАТО се собраа пред зградата на парламентот.

Опозициските пратеници од редовите на Демократската партија на социјалистите на Мило Ѓукановиќ не присуствуваа на собраниската седница.

Грција почна да издава дигитален сертификат за вакцинација против коронавирусот, а грчкиот премиер Кирјакос Мицотакис изјави дека тоа е уште една грчка иновација.

Мицотакис на состанокот за спроведување на националниот план на Грција за вакцинација рече дека потврдата не значи ограничување, туку дополнително олеснување за движење и патување.

Тој изјави дека сертификатот ќе служи за потврда на законската вакцинација, но и за лична употреба на граѓаните и уште еднаш го повтори својот предлог до Европската Унија за единствен сертификат во согласност со европските стандарди.

„Ова не е ограничување, но ќе ни олесни да се ослободиме од ограничувањата што во моментот ги наметнува коронавирусот за патување на европските граѓани. Тоа е нешто што ќе значи особено за нашиот туризам и перспективите на нашата економија, пред сè, пред летната сезона“, рече Мицотакис.

Предлогот на Мицотакис за единствен сертификат ќе се дискутира на утрешниот самит на ЕУ, а Мицотакис изрази надеж дека ќе се постигне договор за единствен систем за сертификација.

На утрешната видеоконференција лидерите на земјите членки на ЕУ ќе разговараат за солидарноста на ЕУ со трети земји кога станува збор за испораката на вакцините, но не се очекува конкретизација на датумите или количината на дозите што може да пристигнат на Западен Балкан.

„Нема временска рамка за испорака на вакцини во трети земји. Ситуацијата е веќе доволно комплицирана во рамките на ЕУ поради проблеми со производството. Нашата намера е тоа да го реализираме кога самите ќе напредуваме доволно“, вели официјален претставник на ЕУ.

Во пресрет на утрешниот состанок на лидерите на ЕУ, кој ќе се состане деветти пат преку видеоконференција посветена исклучиво на борбата против пандемијата на Ковид-19, тие потенцираат дека земјите од Западен Балкан не треба да се сомневаат во принципот дека ЕУ ќе биде тука за своите партнери и дека ќе се залагаат вакцините како глобално добро да ги добијат сите што имаат потреба од нив.

Европската комисија го повика Западен Балкан да биде трпелив уште неколку недели и дека се воспоставува механизам во ЕУ, што треба да им овозможи на партнерските земји пристап до 2,3 милијарди дози вакцини обезбедени од ЕУ преку заеднички набавки.