Според најновата стратегија за вакцинација издадена од словенечката влада, луѓето кои се заразиле со коронавирус ќе добијат само една доза од вакцината против Ковид-19, додека оние кои се заразиле по првата доза, ќе ја добијат втората доза шест месеци по закрепнувањето.

Според таа стратегија, вакцините сега се достапни за родители на деца од ранливи групи и хронично болни деца.

Во исто време, во Словенија продолжува вакцинацијата на лица над 60 години и хронични пациенти над 18 години. Во употреба се вакцините на три различни производители – „Фајзер“, „Модерна“ и „Астразенека“, кои се даваат во две дози на оние кои не се заразиле со коронавирус.

Албанскиот премиер Еди Рама го гледа мини шенгенoт како можност за, како што рече, отстранување на границите меѓу Албанија и Косово, но верува дека ќе поминат години додека Приштина да го сфати тоа.

Рама тврди дека идејата за регионален шенген потекнува од поранешниот албански премиер Фатос Нано и дека тој прв ја поттикнал идејата меѓу лидерите на земјите членки на „мини шенген“, пренесуваат приштинските репортери.

Тој исто така смета дека Приштина треба да даде приоритет на дијалогот со Белград, за Косово да достигне повисоко ниво во економска и социјална смисла.

„Првиот регионален шенген беше артикулиран од Фатос Нано во време кога се чинеше лудо. Јас повторно го воведов затоа што беа создадени услови. Регионалниот шенген значи отстранување на границата меѓу Албанија и Косово, но додека тие во Косово го сфатат тоа, ќе поминат години и Косово ќе губи време. Мини шенген е идеја што јас најпрво ја протуркав и имам сведоци за тоа. Откога првпат се собравме во Берлин“, рече Рама.

Говорејќи за дијалогот меѓу Приштина и Белград, Рама изјави дека за него иднината на Косово без решителност да се стави крај на дијалогот е нејасна, не во смисла на независност, туку во однос на капацитетите што можат да бидат на располагање за да се подигне Косово на повисоко ниво, во економски и социјален аспект“.

„Мора да видиме како ќе се одвива процесот на Косово“, рече Рама.

На прашањето за работата на косовскиот премиер Албин Курти, Рама рече дека нема да го коментира Курти пред 26 април, кога се одржуваат парламентарните избори во Албанија.

„Јас не го коментирам Курти. Немам коментари за Курти до 26 април. Тогаш можам да зборувам”, рече Рама.

Со симболично притискање на црвеното копче, словенечкиот премиер Јанез Јанша во Марибор го пушти во употреба суперкомпјутерот „Вега“, проект вреден 17,2 милиони евра, кофинансиран претежно од европските фондови.

„Драго ми е што Словенија застанува рамо до рамо со светските суперсили во областа на информатичките технологии“, порача словенечкиот премиер.

Тој додаде дека суперкомпјутерот поставен во просториите на Институтот за информатички науки во Марибор, а именуван по словенечкиот математичар Јуриј Вега, ќе им служи на домашните и на европските научници.

Според Алеш Бошњак, директор на институтот во Марибор, „Вега“ е еден од најмоќните суперкомпјутери во Европа и во светот.

„Во моментов има само 13 земји во светот кои имаат посилни суперкомпјутери“, рече Бошњак.

Суперкомпјутерот „Вега“ има моќност од 6,9 петафлопси, што е приближно како кога околу 50.000 компјутери би ја правеле истата операција паралелно.

„Моќта на нашиот суперкомпјутер е веднаш зад капацитетите на оние на Велика Британија, а пред оние во Руската Федерација“, рече проректорот на Универзитетот во Марибор, Зоран Рен.

„Суперкомпјутерите ќе им овозможат на европските мали и средни претпријатија да влезат во високотехнолошката економија на иднината“, рече Маргарет Вестагер, потпретседателка на Европската комисија одговорна за дигитална трансформација на економијата, која преку видеоврска им се обрати на учесниците на церемонијата во Марибор.