Во Србија во изминатите 24 часа се регистрирани нови 7.664 случаи на Ковид-19, а 57 луѓе починале како резултат на оваа болест.

На респиратор има 274 пациенти, а хоспитализирани се 6.679 лица.

За време на епидемијата на коронавирус во Србија, 9.214 луѓе починаа како резултат на Ковид-19, а стапката на смртност беше 0,87.

Како што се наведува, направена е анализа на 25.339 примероци.

Поради ситуацијата со коронавирусот, за утре во 11 часот е закажана седница на кризниот штаб.

Премиерката на Србија, Ана Брнабиќ, пред два дена објави дека во текот на неделата ќе се одржи седница на тоа тело, на која треба да се разгледа дали треба да се воведат дополнителни мерки.

Во Словенија во последните 24 часа се потврдени 1.669 нови случаи на коронавирус, со рекордни 31,9 проценти позитивни тестови.

Министерството за здравство објави дека 1.669 заразени лица биле откриени за 5 часа од 5.230 тестови, што значи дека речиси една третина од тестираните биле позитивни.

Во моментов, просечниот број на потврдени инфекции дневно е 1.074, објави словенечкиот Институт за јавно здравје.

Премиерот, Јанез Јанша, рече дека ако продолжат негативните трендови, општеството и економските активности ќе треба да се затворат.

Причината за повторното ширење на инфекцијата ја гледа во малиот опфат на вакцинација, но и јавните собири и протести. Јанша предупреди дека ширењето на епидемијата во Словенија во последните неколку дена е најбрзо во Европа.

Се очекува денеска во Стразбур да биде усвоен Пакетот за проширување на земјите од Западен Балкан.

Пакетот за проширување вклучува и годишен извештај за напредокот на Македонија и другите земји од Западен Балкан во исполнување на критериумите за членство во ЕУ, потврди Европската комисија.

Комесарот Оливер Вархеји ќе го претстави Пакетот за проширување на прес -конференција во 17:15 часот, откако ќе го претстави пред членовите на Комисијата за надворешна политика на Европскиот парламент, беше објавено во Комисијата.

За Македонија е клучно и овој извештај уште еднаш да ја потврди подготвеноста на земјата за започнување на преговорите за членство со ЕУ, како што тоа повеќе пати е посочено во Европската комисија и Европскиот свет.

Земјата не може да ги почне преговорите со ЕУ поради блокадата на Бугарија за билатерални прашања.

Пакетот за проширување што го изработи Европската комисија вклучува проценка на состојбата и реформите во земјите во процесот на пристапување во Унијата.

Пакетот исто така вклучува индивидуални извештаи за земјите од Западен Балкан и Турција, кои се во различни фази на пристапување во ЕУ.

Пакетот за проширување се објавува еднаш годишно и е најважниот документ што укажува на состојбата во сите области, го оценува исполнувањето на економските и политичките критериуми и дава препораки за понатамошни реформи на земјите на патот кон членство во ЕУ.