Во последните 24 часа во Србија се потврдени 3.572 нови случаја на коронавирус, а 35 лица починаа. Направени се 16.116 теста.

Во последните денови во Србија се забележува пад на бројот на нови случаи, вчера беа отворени трговските центри, а набргу учениците ќе се вратат во училиштата.

Во текот на неделата кризниот штаб треба да донесе одлука за отворање на внатрешните делови на угостителските објекти.

Сепак, многу забрани остануваат во сила, како што е забраната за собирање повеќе од пет лица.

Воздухопловната компанија Grecian Air Seaplanes најави дека ќе воведе летови со хидроавиони во септември за подобро поврзување на островите со копното откако пристаништата добија дозволи за овој вид транспорт.

Во почетната фаза флотата ќе вклучува три хидроавиони со 19 седишта, кои ќе летаат од пристаништата на Јонското Море, а со текот на времето нивниот број треба да се зголеми.

Хидроавионите може да функционираат како дополнување на другите превозни средства, вклучувајќи траекти и стандардни авиони, а исто така може да се користат за чартер-летови, медицински превоз и товарни услуги, истакнува „Ројтерс“.

Грција има вовлечено крајбрежје од 16.000 километри, кое е идеално за услуги со хидроавиони. Превозниците може да го подобрат пристапот до многу туристички дестинации и слабо поврзани острови, што би го зајакнало туризмот.

Компанијата соопшти дека планира да ги прошири деловните активности паралелно со издавање лиценци на пристаништата на островите во Јонското Море, вклучувајќи ги Крит, Киклади, Споради и Додеканези.

Позицијата на Европската Унија е многу јасна кога станува збор за Западен Балкан и границите, нема ништо што треба да се промени, рече денес портпаролот на Европската комисија, Пeтeр Стано, одговарајќи на новинарско прашање за наводниот нон-пејпер, документ на словенечкиот премиер Јанез Јанша, кој, според некои медиуми, тој веќе го има испратено во Брисел.

Европската комисија соопшти дека тие не знаеле за ваков документ и дека медиумите треба да ги контактираат словенечките партнери или Европскиот совет, до чиј претседател наводно бил испратен документот, пишуваат агенциите.

„Не сме примиле, виделе или знаеле за таков нон-пејпер, па затоа нема да коментирам нешто што е претпоставена тема на тој документ и за кое велите дека се граници“, рече Стано на брифинг со новинарите.

„Овде нема што да се смени. Позицијата на ЕУ е многу јасна кога станува збор за Западен Балкан и границите. Нема ништо што треба да се смени тука. Треба да работиме на регионална соработка, помирување, тоа е логиката на процесот на пристапување“, рече Стано додавајќи дека сите можни отворени прашања меѓу земјите во регионот треба да се решат во процес што не навлегува во опасни зони придржувајќи се кон до законите и принципите на ЕУ.

Самиот Јанша ги негира обвинувањата велејќи дека последен пат се сретнал со Мишел минатата година и додаде дека било тешко да му предаде што и да било во февруари или март годинава.