Портпаролот на Стејт департментот Метју Милер изјави дека американската порака до Белград и Приштина е да продолжат да се воздржуваат од насилство и да се вратат на дијалогот со посредство на ЕУ.

Тој го кажа ова на редовниот брифинг со новинарите, а на прашањето каква порака им испраќа на Србите на Косово, со тоа што Стејт департментот не упатил сочувство до српските жртви, Милер рече дека САД постојано го изразуваат своето сочувство за жртвите на насилството.

„Мислам дека бевме прилично доследни во изразувањето на нашето сочувство до жртвите на насилство и во оваа ситуација и ширум светот, а една од пораките што ги имавме за двете страни во овој конфликт е да се воздржат од насилство и да се вратат во Дијалог со посредство на ЕУ. Тоа е сепак нашата порака“, рече тој.

В.Д. директорката на основното училиште „Владислав Рибникар“ во Белград, Анѓела Петровиќ поднесе оставка од таа функција, изјави за Euronews Србија Игор Ѓорѓевиќ, претседател на Советот на родители.

За вршител на должноста раководител на основното училиште „Владислав Рибникар“ е назначена на почетокот на јули. Таа ја смени претходната директорка на училиштето Снежана Кнежевиќ.

Ѓорѓевиќ вели дека родителите не биле задоволни од соработката со новиот директор и дека претходно побарале директор на установата да биде некој од колективот.

„Го поддржуваме изборот што го прави колективот. Ќе поддржиме кој и да избере. Се надеваме дека овој пат ќе не слушаат и дека ќе има некој од колективот“, рече Ѓорѓевиќ.

На 3 мај се случи масовно убиство во ОУ „Владислав Рибникар“ кога ученик од седмо одделение уби девет ученици и училишен чувар, а повреди шест лица.

Генералниот директор на косовската полиција Газменд Хоџа денеска изјави дека косовската полиција го зголемила присуството на север и дека редовните полициски патроли се намалени.

„Го зголемивме присуството и будноста околу граничниот појас. Исто така, го зголемивме присуството на специјалната единица на косовската полиција на северот на Косово. Малку ги намаливме редовните полициски патроли бидејќи немаат таков степен на заштита да се соочат со секој можен напад“, вели Хоџа во изјава за Радио Слободна Европа.

Тој не соопшти детали колку се зајакнати капацитетите на специјалната единица, но рече дека институцијата што ја предводи е постојано во координација со мировната мисија НАТО – КФОР и со мисијата на Европската унија за владеење на правото во Косово (ЕУЛЕКС).

Ново засилување на присуството на специјалните полициски сили на северот на Косово се случи по убиството на полицаецот Африм Буњаку во неделата во вооружен напад во Бањска кај Звечан.

Во акцијата што следеше беа убиени тројца напаѓачи, Срби од Косово, а повеќе беа уапсени.

На тројца од уапсените им е одредена мерка притвор во траење од 30 дена, додека четворица се ослободени поради, како што соопшти Специјалното обвинителство на Косово, немање докази.

Запленет е арсенал оружје, додека неколку напаѓачи избегале и, според приштинските медиуми, се лекуваат во болниците во Србија.