Албанскиот премиер Еди Рама изјави дека иницијативата Отворен Балкан нема да запре, бидејќи, како што рече, иднината не може да се запре.

Тој на „Твитер“ напиша дека противниците на иницијативата не гледаат или разбираат дека таа „промовира мир, соработка, интеграција и го забрзува Берлинскиот процес“.

„Отворениот Балкан нема да запре бидејќи иднината не може да се запре“, напиша Рама, пренесува „Коха диторе“.

Претходно, црногорскиот претседател Мило Ѓукановиќ и неговата колешка од Косово, Вјоса Османи, рекоа дека го гледаат Берлинскиот процес како единствена сеопфатна регионална соработка.

Зборувајќи за иницијативата Отворен Балкан, Ѓукановиќ рече дека го поддржува Берлинскиот процес во кој активно учествуваат сите земји од регионот.

Младиот човек чие тело е пронајдено во Дунав е Матеј Периш. Според српски „Телеграф“, ДНК анализата докажала дека се работи за исчезнатиот жител на Сплит. Причината за смртта е давење, покажала обдукцијата.

Неговото тело било извлечено од морнари вчераутро околу 9 часот и 30 минути. Телото е пронајдено на местото наречено Ада Хуја, а ДНК анализата ја нареди Вишото јавно обвинителство во Белград.

Телото на младиот човек го пронашол капетан на брод, Милован Зеленовиќ.

„Одевме по палубата и видовме како водата носи тело. Ветерот го донесе, пловеше низводно по Дунав. Потоа пристигна полицијата. Телото беше во фаза на распаѓање, едно момче кое помина, провери на интернет и виде дека е облечен исто како Матеј Периш. Имаше една бела патика и црна маица. Кога човек ќе се удави тој е свртен со телото кон долу“, рече Зеленовиќ.

Таткото на Матеј, Ненад Периш, вчера во неколку наврати стави до знаење дека починатиот помлад маж најверојатно е неговиот син.

Телото е пронајдено четири и пол месеци по исчезнувањето на сплиќанецот. Матеј исчезна ноќта меѓу 30 и 31 декември. Истрчал од клубот „Готик“, трчал низ белградските улици, се обидел да запре такси, а потоа, како што може да се види на снимка од надзорната камера на ресторанот „Саванова“, се спуштил по скалите кон Сава. Но, не се гледа дека влегол во водата.

После тоа почна голема потрага, а српската полиција со недели вршеше увид во Сава и Дунав. Истрагата беше проследена со бројни шпекулации, но и теории на заговор.

Најпознатиот светски метеоролошки сервис AccuWeather објави летна прогноза за цела Европа. Според извештајот, Португалија, Шпанија и Италија ќе се соочат со жежок период со многу покачувања и падови на температурата во текот на целата сезона.

Секој топлотен бран во областа ќе трае една или две недели и ќе се карактеризира со рекордни температури, но тие треба да бидат прекинати со бавни бури што ќе доведат до пад на температурите и врнежи.

Јужниот дел на Европа го очекува рекордна жештина, со невреме. Слично како и минатото лето, градовите ширум Балканот годинава може да очекуваат повеќе денови со температури над 32 Целзиусови степени.

Во 2021 година, во Букурешт се забележани 35 дена со температури од или над 32 Целзиусови степени. Слично беше и со Атина, каде имало 67 дена со температура од најмалку 32 степена, што е значително над вообичаениот просек од 46 дена.

Метеоролозите на AccuWeather годинава предвидуваат дека температурите ќе надминат 32 степена меѓу 31 и 38 дена во Букурешт и меѓу 55 и 63 во Атина.

Топлите периоди ќе бидат придружени со суши, иако годинава се очекува да бидат поблаги од 2021 година.

Во втората половина на летото би требало да има повеќе грмежи отколку во првата. Сепак, тие веројатно нема да бидат доволно распространети за да стават крај на проблемите што ќе ги донесе периодот на суша.

AccuWeather наведува дека грмотевиците би можеле да бидат меч со две острици, во смисла дека до одреден степен ќе го ублажат периодот на суша, но дека ќе донесат сериозни временски катастрофи, вклучително и бури што може да ги оштетат посевите на пченица и пченка.

Летните горештини не треба да го погодат северниот дел на Европа колку јужниот дел, велат метеоролозите.