Разликата во гласовите помеѓу владејачката партија Сириза и главната опозициска партија Нова демократија ќе биде голема на изборите за Европскиот Парламент кои се одржуваат следната недела, изјави портпаролот на пратеничката група на Нова демократија, Никос Дендијас.

„Во случај на било каков исход во кој владејачката партија би била второпласирана, тоа ќе значи дека Сириза загубила и премиерот Алексис Ципрас би требало да поднесе оставка“, изјави Дендијас за грчката агенција „АНА“.

Благодарение на бројни меѓународни донации, пред сѐ од Европа, на Косово се отворени многу клиники со најсовремена опрема, каде што меѓу другото, се вршат нелегални трансплантации и трговија со човечки органи, пишува српскиот дневен весник „Вечерње новости“, а пренесува агенцијата „Танјуг“.

Потсетувајќи дека пред два дена, косовската полиција при контрола на приватна клиника во Приштина уапсила четворица осомничени лица за нелегална трансплантација и трговија со органи, весникот пишува дека последните петнаесет години профитабилна работа на Косово станло отворањето на приватни клиники на кои во најголем дел работат нестручни луѓе.

„Во нив се спроведуваат вакви црни интервенции“, пишува белградскиот дневен весник, потсетувајќи дека косовската полиција пред околу еден месец уапсила четворица за идентично кривично дело.

Агенцијата „Танјуг“, повикувајќи се на весникот, пренесува дека сомнителни клиники на Косово на најцрн начин прават обрт од милиони евра.

Српскиот претседател, Александар Вучиќ, попладнево пристигна во Грделица, на локацијата Косина 2, на последната и најсложена делница од автопатот на јужниот крак од Коридорот 10, пренесе агенцијата „Танјуг“.

Според агенцијата, овој дел од патот во минатото предизвикал многу проблеми, а на истиот се изградени дури 36 мостови и два најдолги тунели.

Вучиќ во придружба на членови на српската Влада и претставници од медиумите, со отворени автобуси направија обиколка по оваа делница која вечерва во 20 часот е официјално отворена за сообраќај.

Со претседателот на Србија, пристигнаа и премиерката Ана Брнабиќ и членови на владата, како и претседавачот на Претседателството на Босна и Херцеговина, Милорад Додик.

Вучиќ на обиколката на јужниот крак од Коридорот 10, истакна дека важно е оти Србија има целосна стабилност на јавните финансии за да може да гради патишта, бидејќи сама ги финансира зафатите.