Неколку десетици илјади граѓани, заедно со хрватското политичко раководство, денеска во Вуковар учествуваа на одбележувањето на 28-годишнината од страдањето на овој хрватски град во тримесечната опсада на припадници од тогашната Југословенска народна армија (ЈНА) и српски паравоени формации.

Годинава, комеморацијата на Денот на сеќавањето на жртвите од Вуковар во 1991 година се одвива под слоганот „Вуковар – место со посебен пиетет“.

Собирот почна во кругот на вуковарската болница, од каде што поворката, предводена од хрватски воени ветерани и членови на семејствата на загинатите и исчезнатите, мина низ централните градски улици до 5,5 километри оддалечените Меморијални гробишта за жртвите во татковинската војна, каде што беа поставени венци.

Во колоната беа и хрватската претседателка, Колинда Грабар-Китаровиќ, и премиерот Андреј Пленковиќ, како и многубројни хрватски министри. По мисата, државните делегации положија венци и кај спомен-обележјето на местото на масовната гробница кај Овчарa, јавуваат хрватските медиуми, a пренесе „Танјуг“.

Во 1991 година, од август до ноември, Вуковар беше под опсада на ЈНА и паравоените српски формации 87 дена. Според официјалните хрватски податоци, за време на тримесечната опсада загинале 2.700 хрватски бранители и цивили, а повеќе од 2.500 биле ранети.

Речиси 5.000 луѓе биле однесени во логори во Србија, а приближно 22.000 Хрвати и друго несрпско население биле протерани од градот. Околу 300 лица и натаму се водат како исчезнати.

Секој ден околу 7.000 гранати паѓале врз овој град предизвикувајќи уништување на речиси 90 проценти од градските згради.

Албански терорист на Косово планирал да го разнесе манастирот Високи Дечани, а приведено е лице за кое се сомнева дека сакало да го изведе нападот, пренесува „Вечерње новости“.

Весникот наведува дека никој не ги информирал монасите во ова православно светилиште за настанот и дека уапсениот Албанец со иницијали А.И. всушност бил обвинет за грабеж и принуда, иако оштетените лица сведочеле дека тој со месеци ги принудувал заедно да го нападнат манастирот.

Официјалните институции на Приштина се обиделе да ја демантираат поврзаноста на овој настан со тероризмот, но портпаролот на косовската полиција, Даут Хоџа, не го оспори итниот интерен извештај на косовската полиција од кој оваа поврзаност е јасна.

Манастирот Високи Дечани, единственото српско светилиште во Косово, што и понатаму е под заштита на војниците на КФОР кои го чуваат, е честа цел на албанските екстремисти.

Припадниците на италијанскиот КФОР во 2016 година го осуетија планот на џихадистите да го нападнат манастирот, а српските безбедносни сили дојдоа до сознание дека Високи Дечани и Пеќката патријаршија биле цел за напад и за божикните празници во 2018 година, но дека нападот бил откажан во последен миг.

„Вечерње новости“ наведуваат дека приказната за нападите воопшто не зачудува ако се знае дека Качаник е означен како база за обука на припадниците на Исламска држава, односно за џинадистичка престолнина на Европа. „Њујорк тајмс“ го прогласи Качаник за престолнина на вахабизмот, а во извештајот на Стејт департментот е наведено дека 400 Албанци од Косово војуваат на страната на ИД во Сирија, додека неофицијалниот број е многу поголем.

Здравствената состојба на претседателот на Србија, Александар Вучиќ, е стабилна и тој е пуштен дома, по неколкудневното лекување на Воено-медицинската академија (ВМА), јавува РТС.

Вучиќ претходно најави дека денеска ќе се врати на работните обврски. Тој во болница беше примен поради проблеми со срцето. Министерот за здравство, Златибор Лончар, вчера изјави дека српскиот претседател има хронични, помали проблеми со срцето, но дека во петокот неговата здравствена состојба се влошила кога решил да се обрати до лекарите и дека по приемот на ВМА е проценето дека претседателот на Србија е животно загрозен.