Владата на Кантонот Сараево прогласи вонредна состојба во главниот град на БиХ поради екстремно загадениот воздух, кој го смести градот на првото место на Светскиот индекс за квалитет на воздухот.

Просечните дневни вредности на честичките ПМ10 достигнаа рекордни вредности на пет мерни станици, објави Сараевскиот кантон. Ова е двојно повеќе од концентрациите на загадувачи во Дака (Бангладеш) и Њу Делхи (Индија), кои се на второто и третото место. Индексот на квалитетот на воздухот (AQI) во Сараево моментално изнесува алармантни 368, што го става воздухот во градот во категоријата „опасен“.

Со цел да се заштити здравјето на граѓаните, Владата на округот Сараево воведе рестриктивни мерки. Сообраќајот на возила со ЕУРО3 и пониски стандарди за мотори е забранет во внатрешната градска зона, а наредено е и привремено стопирање на технолошките процеси кои произведуваат прашина, каде што е технички изводливо.

На работодавачите им се препорачува да ја организираат работата од дома, додека капацитетот на еколошки јавен превоз се максимизира. Промената на временските услови што може да влијае на квалитетот на воздухот не се очекува до четврток, но стручното тело на округот Сараево предупредува дека е неизвесно дали тоа ќе доведе до значително подобрување.

Владата ги повикува граѓаните да ги минимизираат активностите на отворено и да избегнуваат физичка активност на отворено. Заводот за јавно здравје на округот Сараево објави детални здравствени препораки за подобра заштита на населението од негативните последици од загадувањето.

Претседателката на српскиот парламент Ана Брнабиќ ги предупреди студентите кои протестираат и ја блокираат работата на околу шеесетина факултети во сите четири универзитетски центри во Србија дека може да останат без поддршка од државниот буџет и право на студентски дом, а факултетите би можеле да паднат во финансиска блокада и банкрот, пренесе „Ал Џазира“.

Бранот протести во Србија беше предизвикан од смртта на 15 претежно млади луѓе и сериозните повреди на уште двајца кога се урна настрешница на неодамна реновираната железничка станица во Нови Сад на 1 декември, за што значителен дел од јавноста за одговорни ги смета владата и изведувачите, обвинувајќи ги за негрижа и корупција.

Брнабиќ, во екот на студентските протести кои добиваат сè поголема поддршка од јавноста, на седницата на собраниската Комисија за образование, наука, технолошки развој и информатичко општество предупреди дека континуираната блокада на факултетите носи „три закани“ и оти „медениот месец заврши.“

Брнабиќ ја наведе „опасноста дека повеќе од 100.000 студенти ќе го изгубат правото на студирање на сметка на буџетот, а повеќе од 17.000 ќе го изгубат правото на студентско домување“.

Прекините на наставата продолжија и денеска во бројни училишта, а ресорното министерство испрати просветни инспектори во училиштата, предупредувајќи ги наставниците и професорите дека една од мерките може да биде отказ.

Министерот за правда Јилмаз Тунч на социјалните мрежи објави дека државното обвинителство во Болу започна сеопфатна и темелна кривична истрага за пожарот во хотелот во Карталкаја, во кој животот го загубија 66 лица, а 51 лице беа повредени.

„Во рамки на истрагата, предводена од шест државни обвинители, уапсени се четири лица, меѓу кои и сопственикот на зградата. Стручен тим од пет вештаци ја продолжува истрагата за утврдување на причините за пожарот, а се работи и на утврдување на можната одговорност“, рече Тунч.

Тој додаде дека секој чекор од истрагата се спроведува со големо внимание и чувствителност.

„Уште еднаш изразувам сочувство до семејствата на нашите граѓани кои ги загубија животите во оваа трагедија, на повредените им посакувам брзо закрепнување и ги упатувам зборовите на поддршка до сите граѓани погодени од пожарот. Се надевам дека таквите несреќа никогаш повеќе нема да се случи“, рече Тунч.

Повеќе држави веќе испратија до турските власти пораки со сочувство за трагедијата.

Од видеата објвени на социјалните мрежи може да се види дека дел од гостите се обиделе да се спасат спуштајќи се со чарчафи од прозорците, а многумина во паника скокале долу од високите катови.