Во последните 24 часа во Србија 8.590 лица биле тестирани за коронавирус, а 357 од нив биле позитивни.

Починаа 11 лица. Како што рече претседателот Александар Вучиќ во обраќањето до јавноста, ова е втор најлош ден по бројот на новозаразени од почетокот на епидемијата во Србија.

Во моментов, 118 пациенти во српските болници се на респиратори.

Стотици луѓе се собраа вчера во центарот на Белград поради најавата за воведување нов полициски час, а протестот брзо прерасна во масовни демонстрации против владеењето на претседателот Вучиќ. Во денешното вонредно обраќање тој, сепак, најави дека полициски час веројатно нема да има.

Претседателот додаде дека се откажува од полицискиот час, иако лично смета дека тоа е погрешен чекор, но дека сепак конечниот збор ќе го има стручната фела.

„Сакам да им кажам на граѓаните на Србија дека сум против тоа и верувам дека единствен спас за нашата земја е забрана за движење, што би значело брзо закрепнување. Се плашам дека со ова ќе им помогнеме на оние што сакаат да им се додворат на граѓаните“, рече тој.

Претседателот на Србија, Александар Вучиќ, ги осуди синоќешните протести организирани пред Националното собрание оценувајќи ги како акт на политичко насилство.

„Синоќа во Белград бевме сведоци на најбрутално политичко насилство во последните неколку години. Во изминатите осум години Република Србија целосно ја почитуваше слободата на собирање и демонстрација, како и различно мислење“, рече тој.

„Синоќа, иако некои се обидоа да го оправдаат тоа со коронавирусот, бевме сведоци на политички протест, кој не беше пријавен, се случи луѓето кои се со десничарска ориентација да ја нападнат зградата на Националното собрание и да влезат во неа, што значи да се извршат најмалку две кривични дела“, рече тој.

Вучиќ додаде дека полицијата реагирала дури кога собраните лица почнале да ја вандализираат зградата на Националното собрание.

„Соочени со сето ова, полицијата презеде законски мерки. Пристојни и мирни луѓе можеа да видат како тие луѓе се однесуваа меѓусебно и како малтретираа полициски службеници. Пет полициски возила беа запалени, 43 полицајци беа повредени, а едниот има фрактура на черепот“,брече Вучиќ, а потоа покажа и фотографии од полицајци, од кои некои биле нападнати со нож.

Вучиќ истакна дека е нанесена голема материјална штета, како и штета на угледот на Србија.

„Ги разбирам политичките фрустрации, но нема да дозволиме никој да го уништи мирот во Србија. Тоа е пораката до оние внатре и оние што се надвор“, рече Вучиќ.

На Клиниката за инфективни болести на Клиничкиот центар на Србија има 92 пациенти со умерена и тешка клиничка слика, а во болницата во Земун има 380 пациенти, од кои 30 се на интензивна нега, пренесува РТС. Состојбата во Нови Пазар е стабилизирана, а лоша е во Сјеница и Тутин.

Заменик-директорот на Клиниката за инфективни болести, Ивана Милошевиќ, за РТС изјави дека биле тестирани 320 пациенти во изминатите 24 часа, а 100-ина во текот на ноќта.

„Во изминатите 24 часа 144 пациенти се примени во болниците во Белград. Ова значи како да сме ја примиле целата Клиника за инфективни болести во изминатите 24 часа. Има огромен прилив на пациенти“, предупреди Милошевиќ.