Сите ученици од една паралелка од трето одделение во основно училиште во Марибор, Словенија, се во 14-дневен карантин, откако на еден од учениците му бил дијагностициран коронавирус.

Според неофицијалните извештаи на медиумите, момчето било тестирано откако било потврдено дека неговата мајка е заболена од вирусот, а тоа немало никакви симптоми на болеста.

„Мора да бидеме крајно внимателни, така што учениците од тоа одделение остануваат во карантин наредните 14 дена, додека сите други ученици и вработени сè уште можат да доаѓаат на часови нормално, со спроведување на превентивните мерки како и досега“, изјави за весникот „Вечер“ во Марибор Лидија Тодоровиќ, директорка на ОУ „Лудвик Плибершек“.

Ова е прв потврден случај на коронавирус во вториот по големина словенечки град по еден месец.

Градоначалникот на Марибор, Сашо Арсеновиќ, пред две недели веќе го прогласи Марибор за прв град без коронавирус во државата.

Во Црна Гора се исполнети условите за прогласување крај на епидемијата на коронавирус, изјавил Сенад Бегиќ, помошник-директор на Институтот за јавно здравје.

Тој појаснил дека Црна Гора помина два периоди на инкубација од 28 дена без нови случаи на коронавирус.

„Стекнати се епидемиолошките услови за ИЈЗ да размислува за прогласување крај на епидемијата. Тоа е законски дефинирана постапка која вели дека епидемијата може да заврши кога ќе помине периодот на двојна инкубација. Периодот не е дефиниран со закон. Тој е повеќе дефиниран со некои епидемиолошки правила. Две инкубации без нови случаи и навистина се исполнети условите за да се одјави епидемијата“, рекол Бегиќ во утринската програма на РТЦГ.

Тој додал дека правно-формално ова на терен не менува многу затоа што ризикот од вирусот сè уште останува.

„Одјавата на епидемијата не значи речиси ништо. Првиот бран е формално завршен, но мерките и наредбите на Министерството и препораките на ИЈЗ сè уште остануваат на сила. Тоа се физичко растојание, миење на рацете и употреба на маски. Во сите земји на ЕУ носењето маски е задолжително како и кај нас нас, затоа, на затворени места, на јавни места каде не може да се одржи физичко растојание од два метра задолжително е носење маска. Дали ќе остане така, зависи од понатамошниот тек на болеста“, рекол Бегиќ.

Од земјите од регионот, Словенија е првата земја која прогласи крај на епидемијата. Во Хрватска, пак, во последните 10 дена се регистрирани само три нови случаи.

Цените за изнајмување апартмани и куќи за одмор на хрватското јадранско крајбрежје се драстично пониски од лани, но побарувачката е сè уште скромна.

Изнајмувањето на најевтиниот апартман на Јадранот во претсезоната минатата година чинело 40 евра, колку што чини изнајмувањето на најскапиот оваа година.

Цените на апартманите во 2019 година во претсезоната и по сезоната се движеле од 40 до 100 евра, додека во сезоната биле од 60 до 200 евра.

Годинава цените на апартманите во претсезоната се движат од 25 до 40 евра, додека во сезоната се меѓу 45 и 70 евра.

Хрватскиот портал „Индекс“ наведува дека цела куќа со базен може да се изнајми за 114 евра на ден.

Иако цените се значително пониски од лани, претседателката на Здружението за семеен туризам, Мартина Нимац Калцина, вели за „Индекс“ дека изнајмувањето на приватно сместување засега оди многу лошо.

„Некои луѓе се потпираат главно на своите стари гости, на оние кои претходно резервирале и се во постојан контакт со нив. Но, има многу малку директни, нови резервации. И она што малку има претежно се однесува на изнајмување на цели куќи за одмор”, вели Нимац Калцина.

Таа смета дека сите останати ќе поминат многу лошо и дека прашање е колку гости воопшто ќе има.

„Зависи каква ќе биде ситуацијата кога границите целосно ќе се отворат. Сите се надеваат дека сезоната ќе почне, но реалноста е дека ситуацијата засега е многу лоша. Што се однесува до домашните гости, ним дефинитивно ќе треба да им се даваат попусти и пониски цени за изнајмување”, објаснува Нимац Калцина.