Комисијата на Парламентарното собрание на Советот на Европа (ПССЕ) го избра пратеникот во Бундестагот, Питер Баер, за известувач за ситуацијата во Косово.Во соопштението за медиумите за назначувањето на Баер, Советот на Европа посочи дека Косово се споменува во целосна согласност со Резолуцијата на Советот за безбедност на ОН 1244 и без прејудицирање на статусот.

Баер, известувач за Западен Балкан во германскиот парламент, на 3 септември во Приштина изјави дека Берлин се спротивставува на промена на границите како дел од дијалогот за нормализирање на односите меѓу Косово и Србија и ги повика петте членки на ЕУ кои не го признаваат Косово тоа да го направат.

Европскиот комесар за проширување во заминување, Јоханес Хан, вели дека српскиот претседател Александар Вучиќ му кажал дека по блокирањето на разговорите за членство со Северна Македонија и Албанија, не му е јасно зошто и понатаму би бил мотивиран да преговара со Приштина. Хан ова го кажа во интервју за „Фајненшал тајмс“, а весникот оцени дека таквиот став е удар за ЕУ, која помина скоро 10 години обидувајќи се да посредува во разговорите меѓу Белград и Приштина.

Хан вели дека блокадите се случиле во момент кога треба да се засилат напорите за ЕУ да стане посилен светски играч, како и дека губењето на влијанието во регион, за којшто вели дека е географски и историски близок на ЕУ, остава простор којшто би можеле да го пополнат Кина и Русија.

Тој додаде дека за него е најболно тоа што ЕУ не покажала дека се придржува кон „принципите на партнерство и одговорност“.

Хан додаде дека е горд на напредокот постигнат за време на неговиот мандат во унапредувањето на врските меѓу државите од регионот – Албанија, Босна и Херцеговина, Косово, Црна Гора, Северна Македонија и Србија – кои сè уште се обидуваат да ги надминеат војните и немирите од 90-тите.

Хан го поздрави фактот што лидерите на Северна Македонија, Албанија и Србија презедоа иницијатива да се заложат за укинување на царинските бариери за трговијата.

Претседателот на Србија и лидерoт на Српската напредна партија (СНС), Александар Вучиќ, одлучи да не учествува на конгресот на Европската народна партија (ЕПП) во Загреб закажан за 20 и 21 ноември и за ваквата одлука со писмо го извести претседателот на ЕПП, Јозеф Даул, објави српски „Блиц“.

Во писмото Вучиќ му се заблагодарува на лидерот на ЕПП за поканата да се обрати на конгресот во Загреб, на кој е поканет како претседател на СНС, а како причина за неговото недоаѓање ја наведува хајката што против него се води во хрватските медиуми, пренесе „Индекс“.

Вучиќ наведува дека подготвил сериозна анализа на настаните во регионот, како и на она што заеднички треба да се направи во наредниот период оценувајќи дека во последните неколку недели трае вистински медиумски прогон во речиси сите хрватски медиуми против неговото доаѓање.

„Би сакал да додадам, вистински причини за ваков вид хајка ниту имало ниту има, освен тоа што некои кругови во хрватското општество не може да се навикнат на силната улога на Србија и фактот дека Србија расте економски, а и политички не е веќе на колена“, вели Вучиќ.

Тој во писмото додава дека најважниот дел од неговата политика останува подавањето рака и отворената врата за подобри односи меѓу Србите и Хрватите и меѓу двете земји во иднина, но истакнува дека во никој случај не сака да влијае на понатамошното влошување на позицијата на Србите во Република Хрватска и дека поради наведеното, нема да присуствува на Конгресот на ЕПП во Загреб.