Не можеме да ги предвидиме пораките на народот и да се оглушиме на нив, истакна денеска турскиот претседател, Реџеп Таип Ердоган, во обраќањето на седницата на својата партиска група во парламентот, прва по објавувањето на резултатите од повторените избори за градоначалник на Истанбул, на кои победи кандидатот на главната опозициска партија, Екрем Имамолу.

Ердоан истакна дека во сфаќањето на политиката на неговата партија во никој случај нема лутење или обвинување на народот, туку токму спротивно, преиспитување на причините зошто таа не успеала доволно да се изрази на изборите од 31 март и 23 јуни.

„Во секоја борба што ја водиме 17 години, секогаш имавме поддршка од нашиот народ и секогаш силата за понатамошна борба ја добивавме од него. Продолжуваме да се спротивставуваме на непријателската политика во светот што се води против исламот, муслиманите и Турците“, нагласи Ердоан.

Турскиот претседател рече дека пред нив стојат целите до 2023 година изразувајќи надеж дека тие ќе бидат постигнати и дека во наредниот период на дневен ред се прашањата од економијата и безбедноста.

На новинарско прашање во врска со можна ревизија на Владата, Ердоган одговори: „Ако е потребно такво нешто, тоа ќе го направиме ние. Измени во владата не се прават со наметнувања однадвор“.

А. А. Кочан

Албанскиот претседател, Илир Мета, ја осуди одлуката на албанската изборна комисија за одржување на локалните избори на 30 јуни повикувајќи ја владејачката коалиција на чело со Социјалистичката партија на Еди Рама да седнат зад предговарачката маса и да не спроведуваат, како што рече, имагинарен процес на гласање, пренесе АП.

Претседателот Мета изјави дека преговорите за членство на Албанија во Европската Унија нема да бидат отворени ако во земјата в недела се одржат локални избори, без опозицијата која бојкотира.

Изборниот колегиум составен од пет судии вчера донесе одлука локалните избори да бидат одржани во земјата според првичниот план на 30 јуни одбивајќи да ја прифати уредбата на претседателот за одложување на изборите поради актуелната политичка криза.

Мета одложувањето на изборите го образложи со стравување дека гласањето би било недемократско без учество на опозициските партии и нагласи дека во таков случај постои можност за граѓански немири.

Албанскиот премиер, Еди Рама, инсистира изборите да бидат одржани на 30 јуни, а одлуката на претседателот Мета за одложувањето на изборите ја оцени како антиуставна.

На вчерашниот состанок албанската обединета опозиција на чело со Демократската партија на Љуљзим Баша го потврди ставот за бојкот на изборите порачувајќи дека на 30 јуни нема да бидат одржани локалните избори.

Тие наведоа дека против владејачката хунта оправдан е секој вид отпор.

Лидерот на најголемата грчка опозициска партија, Нова демократија, Киријакос Мицотакис, ги повика граѓаните што помасовно да учествуваат на претстојните предвремени избори во земјата.

Како што рече, силниот мандат што Нова демократија сака да го добие може да зависи од неколку гласа, пренесе новинската агенција АНА-МПА.

Мицотакис истакна дека силниот мандат на Нова демократија ќе овозможи формирање влада која ќе има капацитет за спроведување на реформите во Грција.

Предвремените парламентарни избори во Грција, кои се закажани за 7 јули, беа распишани по барање на премиерот Алексис Ципрас бидејќи неговата партија на локалните избори и на изборите за Европскиот парламент освои речиси десет отсто помалку гласови од Нова демократија.