Првите количини на кинеската вакцина против коронавирусот на компанијата „Синофарм“ ќе пристигнат утре во Србија, објавија повеќе српски медиуми.

„Новости“ пишува дека Агенцијата за лекови и медицински помагала (АЛИМС) сè уште нема издадено дозвола за употреба на кинеската вакцина, но се очекува наскоро да биде дадена.

Најверојатно в недела со кинеската вакцина ќе почне имунизацијата на здравствените работници кои изјавија дека сакаат да се вакцинираат.

Во Србија во тек е имунизација со вакцината на Бионтек/Фајзер и со руската вакцина „Спутник 5“.

Во Словенија во последните 24 часа потврдени се 1.478 нови инфекции со коронавирус, а 23 пациенти починале од компликации со Ковид-19, објави словенечкото Министерство за здравство, а поради епидемиолошката состојба, властите не размислуваат за ублажување или укинување на мерките.

Иако трендот во последните денови покажува релативно намалување на бројот на нови инфекции, а бројот на новозаразени во последните 24 часа е скоро за 600 помал од пред една недела, владата сè уште не размислува за мерки за ублажување, со оглед на критериумите утврдени со т.н. семафор.

Според новите податоци на Министерството за здравство, во Словенија во моментов има 22.941 активен случај на инфекција со коронавирус, просечниот број на дневни инфекции во последните седум дена е 1.465, во болниците има 1.266 ковид-пациенти, од кои 199 се на интензивна нега.

Во земјата досега се регистрирани 3.093 смртни случаи од Ковид-19, а властите веруваат дека со забрзана кампања за вакцинација и имунизација, поголемо отворање и укинување на мерките може да се случи во април или мај.

Досега во Словенија се вакцинирани 29.561 лице или околу еден и пол процент од населението, а скоро целиот персонал и корисниците во домовите за стари лица се веќе вакцинирани, како и добар дел од здравствените работници.

Според последниот пресек во Србија се потврдени 1.881 случај на коронавирус, а 23 лица починале. Во последните 24 часа биле тестирани 11.725 лица.

На апарати за дишење се приклучени 195 пациенти, а во болниците низ Србија има 5.462.

Од почетокот на епидемијата во Србија се тестирани 2.448.761 лице, од кои вирусот е потврден кај 368.072.

Коронавирусот однесе вкупно 3.687 животи, а стапката на смртност е 1 процент.

Претседателот на Србија, Александар Вучиќ, потврди дека имало 17.000 пријавувања за вакцина по телефон, и дека ќе се отворат нови линии. Тој додаде дека очекува Србија да вакцинира 80 отсто од населението.