Тројца луѓе загинаа, а најмалку 13 се повредени во тешката сообраќајна несреќа што се случи на булевар во софиската населба Челопечене, откако автомобил кој, според истрагата, учествувал во нелегална улична трка, со брзина поголема од 150 километри на час, удрил во автобус на градската линија 119 и го превртел на страна. Според бугарското обвинителство, двајцата возачи кои се осомничени дека се тркале по сообраќајницата се сметаат за директно одговорни за трагедијата.

Меѓу загинатите се двајца патници во автобусот, мажи на возраст од 27 и 31 година. Едниот починал на местото на несреќата, а другиот им подлегнал на тешките повреди во болница. Подоцна починал и трет маж кој бил хоспитализиран во болницата „Св. Ана“. Меѓу повредените има лица со тешки повреди на главата, скршеници и повеќекратни трауми, а дел од нив се наоѓаат во критична состојба. На местото на несреќата биле испратени десет екипи на брза помош, кои повредените ги пренеле во неколку болници во Софија.

Заменик-градскиот обвинител на Софија, Ангел Канев, изјавил дека досегашните докази укажуваат оти станувало збор за импровизирана трка меѓу два автомобили. Според него, автомобилот што удрил во автобусот го погодил странично со огромна брзина, по што возилото на јавниот превоз се превртело во одводен канал покрај патот. Истражителите утврдиле дека на коловозот речиси и да нема траги од кочење, што дополнително упатува на екстремно висока брзина непосредно пред ударот.

Во едниот автомобил се наоѓале две лица, а во другиот тројца. Според обвинителството, дел од учесниците немале валидни возачки дозволи, а во едното возило дури настанала расправија околу тоа кој всушност управувал со автомобилот во моментот на несреќата. Тестовите за алкохол и наркотични супстанци биле негативни, но одземени се дополнителни примероци за анализа. Еден од автомобилите по судирот продолжил неконтролирано да се движи и уништил автобуска постојка на околу 25 метри од местото каде што бил удрен автобусот.

Несреќата предизвика целосен сообраќаен колапс во североисточниот дел на Софија. Патниот правец кон Казичене и Челопечене со часови беше затворен додека екипите на полицијата, пожарната и форензичарите ги отстрануваа остатоците и вршеа увид. Градоначалникот на Софија, Васил Терзиев, изрази сочувство до семејствата на жртвите, а бугарските власти најавија темелна истрага за околностите под кои дошло до една од најтешките сообраќајни трагедии во главниот град во последните години.

Речиси десет илјади граѓани побарале самоисклучување од учество во игри на среќа откако во август 2025 година во Хрватска беше воспоставен Регистар на исклучени играчи, кој им овозможува на лицата со проблеми со коцкање да се забранат од сите приредувачи на игри на среќа во земјата.

Податоците на Хрватскиот завод за јавно здравје покажуваат дека до 25 мај во регистарот се запишани 9.615 граѓани, при што речиси 90 отсто од барањата се однесуваат на трајно исклучување.

Граѓаните можат да поднесат барање преку системот е-Граѓани, што го искористиле најголемиот дел од пријавените, додека околу една третина од барањата биле поднесени директно преку приредувачите на игри на среќа. Вкупно 1.536 лица поднеле барање за повторно вклучување по истек на периодот на забрана.

Сите лиценцирани приредувачи на игри на среќа се поврзани со регистарот и се должни да го проверуваат статусот на играчите преку матичен број пред да им овозможат учество. Во автомат-клубовите и казината идентификацијата се врши при влез, додека истото важи и за онлајн игрите. Лотариите се сметаат за игри со „низок ризик од зависност“ и за нив не е задолжителна идентификација.

Регистарот на исклучени играчи е воведен во 2025 година со измени на Законот за игри на среќа. Доколку приредувач не го почитува регистарот, се предвидуваат високи парични казни.

Според податоците, проблематично коцкање е присутно кај 1,7 отсто од возрасните граѓани, додека кај младите е значително позастапено. Истражувањата покажуваат дека 22 отсто од учениците на возраст од 15 и 16 години учествувале во некаква форма на коцкање во последната година.

Иако сè уште е рано да се проценат ефектите од регистарот, надлежните институции сметаат дека големиот број пријави покажува зголемена свест кај граѓаните и интерес за заштита од проблематично коцкање.

Бугарскиот премиер Румен Радев повика на посилни дипломатски напори за завршување на војната во Украина и предупреди на растечките ризици од понатамошна ескалација, објави бугарскиот „Новините“.

„Дали знаете во што е нашиот проблем? Европа досега се обидуваше да постигне конвенционална победа против најголемата нуклеарна сила во светот“, рече Радев на маргините на самитот ЕУ-Западен Балкан во Тиват, Црна Гора.

Радев рече дека сите земји треба да придонесат за постигнување мир и да ги поддржат иницијативите насочени кон завршување на конфликтот. Тој тврдеше дека на Европа ѝ недостасуваат средства за борба против хиперсоничното оружје на Русија и предупреди дека сегашниот пристап ги зголемува безбедносните ризици.

„Ова го зголемува ризикот енормно. Ние го зголемуваме нуклеарниот ризик“, рече тој.

Радев додаде дека секој напор кон договорено решение треба да биде добредојден, без оглед од каде доаѓа. Тој нагласи дека приоритет треба да биде наоѓање пат кон мир, а не продолжување на конфликтот.