Граѓаните на Србија кои се вакцинирани ќе можат, како што стојат работите, да патуваат во земјите на Европската Унија без ограничувања, и покрај најавеното воведување на ковид-пасоши и дигитални сертификати за вакцинација.

Српската министерката за трговија, туризам и телекомуникации, Татјана Матиќ, посочи дека Србија ги исполнува техничките предуслови за издавање дигитални сертификати што ќе овозможат безбедно патување на граѓаните вакцинирани против коронавирусот.

Претседателот на Националната асоцијација на туристички агенции (YUTA), Александар Сеничиќ, исто така верува дека Србија лесно ќе ги приспособи своите сертификати за вакцинација на земјите од ЕУ.

„Веќе имаме сертификати за вакцинација со QR-код што е двојазичен и каде покрај името и презимето на тој што е вакциниран, се наоѓа датумот, местото на вакцинација и видот на вакцината. Значи, тој документ може да биде дигитален затоа што има QR-код што треба само да се прочита“, нагласува Сеничиќ и додава дека е потребно само да се преведат имињата и презимињата на вакцинираните на латински јазик.

Во предградијата на Атина во неделата избувнаа судири меѓу полицијата и граѓаните по бруталната интервенција на полициските службеници за да се провери дали граѓаните ги почитуваат епидемиолошките мерки, што предизвика бран незадоволство во земјата.

Полицијата употреби солзавец за да растера речиси 500 луѓе кои во неделата попладне беа собрани на плоштадот Неа Смирни, во јужното предградие на грчката престолнина, во знак на протест против инцидент што се случил претходно истиот ден.

На снимките од попладневните часови на истото место се гледа како полицаец со палка безмилосно тепа момче.

Се слуша и младиот човек како лелека од болка додека, пак, минувачите се згрозени од полициската акција.

Полицијата соопшти дека испратиле патрола со мотоцикли на плоштадот Неа Смирни попладне за да проверат дали се почитуваат мерките за контрола на коронавирусот, додавајќи дека добиле голем број извештаи за непочитување на тоа место.

Полицијата додаде дека во тие моменти нејзините припадници биле нападнатти од околу 30 лица, при што биле повредени двајца полицајци. Уапсени се единаесет лица.

Од грчкото МВР исто така соопштиле дека спроведуваат внатрешна истрага за полицаецот кој бил снимен како го удира момчето.

Грчките власти во неделата пријавија 1.142 нови случаи на коронавирус и 53 починати, со што бројот на смртни случаи достигна 6.758 од почетокот на пандемијата.

Од денес, кафулињата и рестораните во два региона, во Посавје и на југоисток од Словенија, ќе можат да работат нормално во пробен период што ќе трае седум дена.

Словенија е во портокалово ниво на ограничувачки мерки, но овие два региона минатата недела, поради падот на бројот на заразени, преминаа во поблага, жолта зона, во која на кафулињата и на рестораните им е дозволено да обезбедуваат услуги на отворено, пренесе агенцијата СТА.

Гостите ќе можат да се опслужуваат од 6:00 до 19:00 часот и ќе треба да ги напуштат објектите до 19:30 часот.

Доколку бројот на заразени се зголеми или инспекцијата утврди кршење на мерките, владата повторно ќе ги затвори кафулињата и рестораните.

Муштериите ќе мора да носат маски, освен кога седат на маса, кога пијат или јадат, а вработените нема да можат да ги симнуваат заштитните маски на работа и ќе мора да се тестираат за ковид еднаш неделно.

Лицата кои биле превакцинирани и поранешни ковид-пациенти се ослободени од правилата за тестирање.

Денеска ќе бидат отворени и средните училишта, така што едната група ученици ќе доаѓаат во образовните институции, другата половина ќе следи часови на интернет од дома и тоа ќе се менува, при што група ученици кои одат на училиште треба да носат заштитни маски.

Државата ќеапочне да ги вакцинира наставниците постари од 50 години, но тие ќе мора да се тестираат еднаш неделно.