Српскиот претседател Александар Вучиќ зборуваше за својата видеопорака објавена вчера на својот инстаграм-профил за која некои оценија дека е снимена под дејство на алкохол.

„Кога ќе им кажете на странските агенти, како оние со кои разговарав во тој момент, дека лажат и кажуваат лаги, секогаш ќе ви кажат дека сте пијани и под дејство на дрога. Никогаш во животот не сум испил шолја кафе, никогаш во животот не сум запалил пура или цигара, никогаш во животот не сум видел никаква дрога“, рекол Вучиќ, а потоа раскажа анегдота од детството.

„Кога имав 17 години, имаше натпревар меѓу ‘Железничар’ и ‘Црвена звезда’. Купот беше… Некој натпревар, отидовме во среда. Тогаш видов некои момци како дуваат лепило прв и последен пат и се замешав со нив, а да не зборувам што се случи потоа. Беше некаде помеѓу Адашевац и Винковци. Никогаш во животот не сум видел или вкусил повеќе. Сакам само да им кажам на луѓето да видат какви лажговци се“, изјави Вучиќ.

Тој изјави дека ваквите напади врз него „немаат крај ниту, пак, некогаш ќе завршат“.

На 105-годишна возраст почина легендарната Бранка Веселиновиќ. Таа беше најстарата жива актерка во светот.

Таа е родена далечната 1918 година во Нови Бечеј, а во текот на кариерата играла во повеќе од 100 претстави во театарот и повеќе од 50 телевизиски серии и филмови.

Добитничка е на многубројни награди и признанија за својата актерска и хуманитарна работа, пренесе „Б92“.

Во Турција граѓаните се сè полути поради, како што велат, бавната и неадекватна реакција на владата на разорниот земјотрес, во кој досега загинаа повеќе од 8.000 луѓе. Спасувачите ги пребаруваа урнатините во текот на ноќта, а беа попречени од студот, уништените патишта и лошата инфраструктура.

На снимките од воздух се гледа како тие ги пребаруваат урнатините на куќите во селото Салќин во провинцијата Идлиб барајќи жртви и преживеани. Турскиот претседател Таип Ердоган прогласи вонредна состојба во 10 провинции. Но, некои жители на градовите погодени од земјотресот изразија гнев и очај поради бавниот одговор на властите на најсмртоносниот земјотрес што ја погоди Турција во последните децении.

„Овде нема ниту еден човек, никој не помага. Снег врне, бездомници сме, без ништо. Што да правам, каде да одам“, изјави Мурат Алинак за „Ројтерс“, а чиј дом се урна во Малатја.

Жителите на градот Газијантеп наведуваат дека 12 часа по земјотресот не пристигнала ниту една спасувачка екипа и дека морале сами да ги пребаруваат урнатините. Кога спасувачите, конечно, дошле во понеделникот вечерта, работеле само неколку часа, а потоа паднала ноќта, пишува „Гардијан“.

Многу Турци го изразија својот гнев на интернет поради, како што рекоа, невнимателниот одговор на итната состојба во најјужната провинција Хатај, при што многумина се жалат дека спасувачите не успеале да стигнат до областа. Во Хатај земјотресот срамни со земја неколку владини згради, вклучително и локалниот разгранок на турската агенција за помош при катастрофи, АФАД.