Германскиот министер за надворешни работи, Хајко Мас, изразил загриженост за преговорите меѓу Србија и Косово.

Тој навел дека обидот за укинување на различностите со поместување на граничните линии е опасно. Хас вчера ја посети Тирана, а денеска е во Атина. Во интервју за „Катимерини“ рекол дека меѓу Србија и Косово треба да дојде до вистинско помирување.

Според него, единствен начин да дојде до тоа е поголема толеранција и прифаќање на различностите. „Спротивно на тоа, сметам дека обидот таа различност да се укине со поместување на границите е опасно“, заклучил тој.

Поранешниот шеф на Хипо банка, Гунтер Штрајдингер, преку видеоврска од затвор сведочеше на судењето против поранешниот хрватски премиер, Иво Санадер, кој е обвинет за примање провизија од оваа австриска банка. Штрајдингер останал на својот исказ од 2011 година, но сега, за разлика од тогаш, бил испитуван преку видеоврска од Клагенфурт, каде што отслужува затворска казна поради незаконско работење.

Штрајдингер рекол дека се сеќава на своето претходно сведочење пред судот во Загреб, но дека поради времето што поминало, заборавил на деталите, освен тоа дека лично не ги водел преговорите за кредитот што Хрватска го зела по осамостојувањето за купување амбасади. Тој не можел да се сети дали преговарал и тогашниот министер за надворешни работи, Мате Граниќ, чиј заменик му бил Санадер, како ни тоа дали била исплатена провизија за која рекол дека е вообичаена при такви зделки.

Одбраната на Санадер истакна дека останува на своите приговори како и по првиот исказ на Штрајдингер, во кој, меѓу другото, рекол дека Санадер ветил дека Хипо банка во Хрватска ќе има повластена позиција. Во првиот исказ Штрајдингер потврдил дека провизијата му била исплатена на лице со име Еуген Лакса, но дека станува збор за помлад човек, а не за 80-годишник.

Во случајот со Хипо банка Санадер е осуден за воено профитерство поради обвинение дека во средината на 90-тите како заменик-министер за надворешни работи зел провизија од австриската Хипо банка, која на Хрватска ѝ дала кредит за купување згради за дипломатските претставништва. Уставниот суд во 2014 година ја укина пресудата и побара ново судење.

Во центарот на градот, на ѕидот на Клиниката за трауматологија е напишано Ein volk ein reich ein fuhrer („Еден народ, едно царство, еден водач”).

Тоа е парола на нацистите кои го слават Хитлер и Третиот рајх, а покрај овој натпис на ѕидот се напишани свастика и усташки симболи.

Графитот на тоа место е веќе некое време, но  ниту градските служби,  ниту Клиниката за трауматологија, ниту, пак, некој друг не покажува интерес да го отстранат.

Затоа Европската граѓанска иницијатива од Загреб испрати пријава до Градот Загреб во која бараат итно да се отстрани графитот.