Косовскиот премиер Албин Курти денеска во Брисел изјави дека Косово сака членство во воената алијанса НАТО.

„Имаме јасна визија. Сакаме членство во НАТО. Ова ќе ни овозможи да го обезбедиме она што мирните и демократски држави и нации го обезбедија и сè уште го обезбедуваат за нашата земја и граѓаните. Во оваа смисла, членството во програмата на НАТО „Партнерство за мир“ би било поддршка“ – рече Курти по средбата со генералниот секретар на НАТО, Јенс Столтенберг.

На заедничката прес-конференција со Столтенберг, Курти изјави дека институциите и граѓаните на Косово имаат причина да бидат претпазливи поради, како што рече, „деструктивниот пристап на северниот сосед“ кон Косово и „регионот воопшто“, како дел на „рускиот план штетен за Европа и Балканот“.

Тој додаде дека владата на Косово и тој како премиер се посветени на тоа политиката на Косово да биде целосно усогласена со НАТО и додаде дека Косово е подготвено да учествува во секој проект на НАТО во полн капацитет.

Курти се заблагодари на НАТО алијансата за досегашниот ангажман во Косово.

„Придонесот на НАТО во формирањето, развојот и професионалноста на Косовските безбедносни сили е примерен успех“, изјави Курти.

Денеска во 17 часот истече рокот во кој партиите и коалициите во Бугарија требаше да ги достават потребните потписи и документи за регистрација за учество на претстојните предвремени парламентарни избори на 2 октомври, информира „БГНЕС“.

Документи за учество на изборите поднеле вкупно 24 партии и 7 коалиции.

Утре ЦИК ќе ја заврши проверката на сите доставени документи, а доколку има некој од потписите што не содржат 2.500 валидни потписи, формацијата ќе биде избришана.

Следниот важен рок е 27 август. До тој датум, само коалициите на партии регистрирани од Централната изборна комисија можат да поднесат апликации за да ги одразат промените што се случија во составот на коалицијата – напуштање партија или пристапување во нова партија.

Бугарите кои живеат во странство можат да се пријават за гласање преку Интернет. Електронската апликација за поднесување барања од Бугари во странство за гласање на предвремените избори ќе се прифаќа од денеска до 6 септември.

Изборите на 2 октомври ќе се гласаат машински, со истиот софтвер како и на последните парламентарни избори.

Властите во Босна и Херцеговина денеска заплениле 73 килограми кокаин вреден неколку милиони евра, што е едно од најголемите откриени количества на оваа дрога во земјата по завршувањето на војната.

Кокаинот бил шверцуван со друга стока што била увезена во Босна и Херцеговина, а бил откриен во акција што била спроведена со помош на партнерските агенции на Европската унија и Европол.

По наредба на Обвинителството на БиХ, членови на Дирекцијата за организиран и сериозен криминал на Министерството за внатрешни работи на Република Српска, дрогата кокаин ја откриле во магацин.

„Ова е една од најголемите заплени на наркотична дрога кокаин во постдејтонска Босна и Херцеговина, а вредноста на запленетите наркотици на нелегалниот нарко пазар изнесува неколку милиони евра“ – се наведува во соопштението на Обвинителството на Босна и Херцеговина. .

Оттаму додаваат дека истрагата се води во соработка со партнерските агенции. Обвинителството на БиХ ја продолжува истрагата со цел целосно да се расветлат сите околности на меѓународниот шверц на кокаин.