Албанија безрезервно поддржува добро воспоставен дијалог меѓу Белград и Приштина, соопшти албанскиот министер за надворешни работи Дитмир Бушати.

Бушати смета дека низ целиот процес на нормализирање на одмосите меѓу Белград и Приштина е неопходно да се изгради внатрешен консензус на Косово, пренесува Танјуг.

,,Безрезервно го поддржуваме дијалогот меѓу Косово и Србија. Мислиме дека процесот на нормализација треба да донесе взаемно признавање”, рекол Бушати.

Кога станува збор за идејата за размена на северот на Митровица за Прешевската долина, Бушати вели дека никогаш не чул за идејата за ,,сецесија” на таа територија.

Поранешниот оперативец на ЦИА, Џозеф Асад, пред три дена бил уапсен во во Абу Даби по потерница од црногорските власти.

Асад во Црна Гора го бараат под сомнение дека бил дел од логистичка мрежа која подготвувала терористички напади на денот на парламентарните избори од 16 октомври 2016 година, објави „Побједа“, цитирајќи повеќе дипломатски извори.

САД, по сознанието за апсењето на Асад, преку дипломатски врски побарале нивниот државјанин да биде ослободен од притвор и да не се екстрадира во Црна Гора.

Црногорските власти издадоа црвена потерница за Асад под сомневање дека бил член на криминалната организација која планирала да ја преземе власта во Црна Гора во октомври 2016 година.

Претходно, поранешен оперативец на ЦИА одби да сведочи повикувајќи се на Петтиот амандман на американскиот устав, кој им дозволува на американските граѓани да не даваат искази пред суд, доколку сметаат дека тоа може да им наштети во процесот. Специјалното обвинителство потоа донесе наредба за покренување истрага против Џозеф Асад.

Претседателите на Србија и Русија, Александар Вучиќ и Владимир Путин, ќе се сретнат на 2 октомври во Москва, објави рускиот амбасадор во Белград, Александар Чепурин, пренесе „Танјуг“.

На средбата се очекува да бидат разгледани клучните билатерални и регионални прашања, а рускиот амбасадор оценува дека расположението е позитивно.

Претходно, Вучиќ преку социјалната мрежа „Твитер“ го пофали Чепурин за искрената заложба за градење на што е можно подобри односи помеѓу Русија и Србија.