Регион
Во Србија, поради обилните врнежи од снег, илјадници луѓе останаа без струја
Обилните снежни врнежи предизвикаа многубројни комунални и сообраќајни проблеми во Србија за време на викендот, една третина од електроенергетскиот систем во моментот не работи, 17 лица беа завеани на планината Маљен, а поради комуналниот хаос во Белград, некои опозициски партии бараат оставка на градската администрација, јавуваат медиумите во регионот.
Обилен снег, скршени гранки и паднати дрвја пресекоа далноводи и оставија илјадници луѓе без струја во некои села во западниот и југозападниот дел на Србија.
Вонредна состојба е прогласена во општините Ивањица, Лучани и Нова Варош, каде што наносите во некои села се високи над еден метар, а затворени се две локални училишта.
На планината Маљен снежно невреме погоди 17 лица, меѓу кои и две деца. Успеале да се сместат во колиба без вода и струја, а планинарската спасувачка служба ги лоцирала и испратила свои екипи.
Министерката за рударство и енергетика, Зорана Михајловиќ, изутринава во Обреновац, каде што е седиштето на клучната термоелектрана „Никола Тесла“, изјави дека во моментот 30 отсто од вкупниот капацитет на електроенергетскиот систем е надвор од функција, а се очекува стабилизација во следните два дена.
Сите магистрални и патни правци што имаат приоритет се проодни, но патниците имаа полни раце работа во текот на ноќта меѓу неделата и понеделникот.
Нарекувајќи ја ситуацијата колапс, неколку опозициски партии денеска побараа смена на градоначалникот Зоран Радојчиќ.
Државниот метеоролошки завод (РХМЗ) за следните два дена најавува жолт метеоролошки аларм и ниски температури од минус осум до еден Целзиусов степен во поголемиот дел од Србија, со исклучок на југоистокот од земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Завршено вештачењето на мобилниот телефон на мајката на Данка, биле бришени пораки и повици, објавија српските медиуми
Мобилниот телефон на мајката на Данка Илиќ бил испратен на вештачење по исчезнувањето на девојчето. Неофицијалните податоци говорат дека мајката избришала многу пораки и повици ден пред и на денот на исчезнувањето на Данка, објави српски „Блиц“.
Според неофицијални сознанија од истрагата, вештачењето на мобилниот телефон на Ивана Илиќ покажало дека се избришани многу пораки и податоци за повици, пишува српски „Информер“.
„На ден пред исчезнувањето и на денот на исчезнувањето на Данка Илиќ многу пораки и повици се избришани од телефонот. Ова го утврдиле инспекторите за високотехнолошки криминал. Пораките и повиците може да се избришат од телефонот, но да останат во базата на податоци“, рекол изворот.
Како што се дознава, пред исчезнувањето на Данка Илиќ мајката трипати го фотографирала детето од разни агли.
Да потсетиме, мајката на Данка Илиќ, Ивана, денеска повторно е во полициската станица во Бор, каде што е на распит за околностите на својата исчезната ќерка. Таткото помина на полиграфското тестирање.
Регион
„Клучот е кај родителите, тие мора да одговорат на едно прашање“, вели поранешен шеф на белградската полиција за случајот со исчезнувањето на Данка
Родителите се тие што имаат многу да објаснат. Прво, зошто чекаа да го пријават исчезнувањето? Колку што знам, чекаа два часа. Познато е дека кога ќе исчезне дете, веднаш се пријавува за да се реагира бргу, изјави Марко Ницовиќ, поранешен началник на белградската полиција, за „Телеграф.рс“.
Според Ницовиќ, полицијата оди во добра насока бидејќи ја проверува секоја педа од земјата, но се надеваат и дека темелно се проверуваат граничните премини бидејќи не ја исклучуваат можноста за киднапирање.
„Би можело да биде сè, не е исклучена никаква можност. Ако мајката рече дека го оставила девојчето на минута, го поставуваме прашањето каде би можело да оди двегодишното дете? Колку далеку, без мајка му да го најде? Второ, зошто чекаа два часа? Има простор и за киднапирање, а знаеме дека границата е блиску, но и за многу повеќе. Отворени се многу прашања и останува да се почека истражните органи да си ја завршат работата“, вели Ницовиќ за српски „Телеграф“.
Да потсетиме, потрагата по двегодишната Данка Илиќ влезе во четвртиот ден. Во потрагата од утрово се вклучени уште 18 пожарникари и кучето Зиги.
Багери вчера цел ден копаа и вадеа ѓубре и шут од куќата, а пред куќата каде што последен пат беше видена исчезнатата Данка по која трага цела Србија, пристигна тешка механизација, која ќе продолжи да работи денес за да се расчисти теренот.
Регион
Нов силен земјотрес ја погоди Грција: се стресе на Крит
Нов земјотрес со јачина од 3,7 степени според Рихтеровата скала ја погоди Грција, соопшти ЕМСЦ.
Земјотресот е регистриран на Крит, на 62 километра од Ираклион, на длабочина од 16 километри.
Земјотресот е регистриран во 12.37 часот по локално време.
Засега нема информации за повредени или материјална штета.
Грција утрово ја погоди силен земјотрес со јачина од 5,7 степени според Рихтеровата скала по што следеа афтершокови.