Регион
Вучиќ гневен поради одлука на „Твитер“: Чекам да ме укинат како Трамп
На листата на српски медиуми кои „Твитер“ ги означи како провладини е додаден уште еден јавен медиумски сервис од Србија, Радио-телевизија Војводина (РТВ).
Претседателот на Србија, Александар Вучиќ, го обвини „Твитер“ за цензура и праша зошто не е во ред споменатите медиуми да соработуваат со Владата.
Српското Министерство за култура, пак, посочи дека е изненадено од постапката на „Твитер“ и наведе дека одлуката е спротивна на принципите и целта на таа мрежа, пишува Н1.
На спорната листа на „Твитер“ се најдоа српските медиуми: „Курир“, „Прва“, „РТС Вести“, „Танјуг“, „Информер“, „Телеграф“, „Политика“, „Телевизија Хепи“, „Пинк.рс“ и „Б92 вести“.
РТВ е единаесеттиот медиум во Србија што „Твитер“ нема да им го препорачува на своите корисници, односно ќе ги предупредува за неговата блискот со Владата.
Председник: Приштина захтевима за признање одрешила руке Србији; Избеглице из Авганистана не траже да дођу у Србију https://t.co/oKkYiNWekV
— RTV (@RTVojvodine) August 19, 2021
Ваквите страници се означени како медиуми во кои српската влада ја контролира уредувачката политика преку финансирање, директен или индиректен политички притисок.
Српскиот претседател не гледа што е спорно за „Твитер“.
„Па со кого ќе соработуваат? Тајкуни, криминалци и крадци? Најнормално е тие да соработуваат со Владата. Ние како држава на повеќето од тие медиуми не им плаќаме. Платени се ‘Гласот на Америка’, ‘Би-би-си’, а не се ставени на листите за владини медиуми. Ова води кон друго прашање – кој е вистинскиот цензор? Едвај чекам да ме исклучат, да бидам уште еден Трамп во светот“, рече Вучиќ.
Сепак, ваквото исклучување на Вучиќ од „Твитер“ досега никој не го најавил, а на тековната одлука на мрежата засега најжестоко реагираше „Информер“ на својата насловна страница. Меѓутоа, пред само шест месеци, главниот и одговорен уредник на „Информер“ го кажа она што сега го наведува и „Твитер“.
„Мојот ‘Информер’ е провладин медиум, по мој избор, не дека некој така ми наредил или платил, туку по мој избор. Па, се разбира дека ќе ја поддржам политиката на оваа влада и оваа држава“, изјави Драган Ј. Вучичевиќ на 13 февруари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.
Регион
Се вештачат трагите од предметите пронајдени во автомобилот во кој била убиена малата Данка
Телото на малото девојче Данка Илиќ (2), кое на 26 март годинава беше брутално убиено во Бањско Поле, сè уште не е пронајдено.
Осомничениот Дејан Драгијевиќ (50) во Вишото јавно обвинителство во Заечар ги изнесе деталите за убиството на детето. Сепак, тој не сакаше да открие каде го фрлил телото на Данка.
Срѓан Јанковиќ (50) не сакал да зборува за делото, а вчера побарал да му дозволат адвокат по службена должност. Во притвор е и таткото на Дејан Драгијевиќ, кој исто така се бранеше со молчење на обвинувањата дека му помогнал на синот да се ослободи од телото.
Понатамошни чекори во истрагата за „Телеграф.рс“ најавија од Вишото јавно обвинителство во Заечар.
„Вишото јавно обвинителство во Заечар издаде наредба вештаци да ги прегледаат трагите пронајдени во автомобилот на Јавното претпријатие за комунални дејности ‘Водовод’ од Бор“.
Сослушувањата на сведоците се во тек.
Вчера, во Вишото јавно обвинителство во Заечар дадоа исказ Ивана и Милош Илиќ, родителите на убиената Данка.