Регион
Вучиќ: КФОР не ја кажува вистината, не е неутрален на Косово
Српскиот претседател Александар Вучиќ рече дека денеска ситуацијата за српскиот народ на Косово е потешка од вчера, а за КФОР порача дека оваа воена мисија во покраината не е неутрална, објави „Танјуг“.
Прашан за изјавата на портпаролот на КФОР дека најголема закана за мирот на Косово и Метохија е реториката на лидерите и злоупотребата на медиумите, како и дека сите биле однапред известени за вчерашната полициска акција, Вучиќ му порача на КФОР јавно да каже кого тоа известил.
„КФОР не ја кажува вистината. Ние добивме разузнавачки податоци за тоа околу 15 мај, а јас на 17 мај излегов во јавност со таа информација и со молба да не го прави тоа“, рече Вучиќ.
Тој додаде дека КФОР не е неутралн и дека се занимава со реторика и со трикови.
„Го повикувам портпаролот на КФОР нека каже кого известил. Вчера во еден момент командантот на КФОР не сакаше да се јави ниту на началникот на Генералштабот на Војската на Србија, па тогаш ни ние не сакавме да се јавиме. Се слушнаа дури околу 11 и 30 часот кога ги предупредивме на настаните. Кога беше најтешко, немаше контакт“, рече српскиот претседател.
Вучиќ кажа дека приштинските власти вчера уапсиле 20 лица, наводно, како што кажа, во рамки на борба против корупцијата, а потоа и поради убиството на Оливер Ивановиќ и Енвер Замбери. Вучиќ праша дали и еден глувонем човек кој е уапсен е виновен за тоа.
„Ајде кажете ни за што се работи. Водите наводна борба против корупција. Како тоа се уапсени двојно повеќе Срби од Албанци? Тоа значи дека Србите се поголеми криминалци во полицијата, а во Приштина сите се чесни“, рече Вучиќ.
Тој предупреди дека крајна цел на Приштина е апсење на командантот на косовската полиција за северот на Косово и Метохија, Жељко Бојиќ.
Тој рече дека вчерашната акција и апсењето на Србите ги принудува српските полицајци да бидат „полоши Албанци од Албанците“, кои, како што рече, нема да бидат.
„Сè што прават е да се злоупотреби нешто и да се обидат од Србија да направат виновник. Но сето тоа мора да заврши и со тоа сите нивни приказни“, рече Вучиќ на новинарите по посетата на воениот гимназиски интернат во Белград, пренесе „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
ХДЗ слави победа на изборите во Хрватска по првите официјални резултати
Објавени се првите официјални резултати од изборите одржани денеска во Хрватска.
Според првите официјални информации, по 25 отсто преброени гласови, ХДЗ слави победа. ХДЗ води убедливо, а резултатите во штабот беа дочекани со ентузијазам и скандирања „победа“.
ХДЗ 65, „Реке правде“ (СДП) со 41, ДП 14, Мост 9, ИДС 4, Можемо 3, Фокус 3, НП Север 2.
Од друга страна, во штабот на СДП владееше молк.
Регион
Три сантиметри снег на Копаоник
На Копаоник се измерени три сантиметри снег, соопштија вечерва за агенцијата Бета во локалната метеоролошка станица.
Врне снег со слаб интензитет и со повремени прекини.
Температурата е минус три Целзиусови степени, а во моментов дува северен ветер со брзина и до три метри во секунда.
Регион
Еден од убијците на Данка бара нов адвокат
Второосомничениот Срѓан Јанковиќ кој цело време се бранеше со молчење во Обвинителството му го откажал полномошното на својот адвокат бидејќи не сака повеќе да го брани.
Јанковиќ побарал да му биде доделен адвокат по службена должност, пренесуваат српските медиуми.
Ова не изненади бидејќи ретко се случува на сред рочиште осомничениот да побара смена на адвокат – велат од обвинителството.
– Понатамошната постапка е таква што следува разговор на новиот адвокат со осомничениот Јанковиќ. Со оглед на текот на рочиштето, апсолутно секој адвокат ќе го советува да престане да се брани со молчење бидејќи подобро е самиот Јанковиќ да каже се што знае. Убедени сме дека е прашање кога Јанковиќ доброволно ќе ја изнесе својата одбрана во обвинителството. Се надеваме дека постои можност да се дознае каде е телото на малата Данка – неофицијално се дознава од надлежните.
Доколку се оствари предвидувањето на обвинителството, се очекуваат нови моменти во истрагата откако Јанковиќ ќе ја каже својата верзија за настаните.