Регион
Вучиќ не ја исклучува можноста за средба со Курти
Српскиот претседател, Александар Вучиќ, не ја исклучува можноста за средба со новиот косовски премиер, Албин Курти, и додаде дека е добра вест што Курти размислува за укинување на таксите. Вучиќ во утринскиот дневник на РТС посочи дека е добро да се седне и да се разговара.
„Важно е да се укинат таксите, да може да се разговара. Курти мора да види и да сфати дека работите не се толку едноставни како што изгледаат кога седите во опозиција и можете да зборувате без каква и да е одговорност“, рече Вучиќ.
Тој истакна дека најавата за укинување на таксите е важна зашто тие во кус временски период предизвикале голема штета.
Прашан дали може да седне на иста маса со Курти и покрај заканувачките пораки кон Белград, Вучиќ рече дека Курти е изборот на албанскиот народ и дека Србија не може да одредува кој ќе биде претставник на албанскиот народ, како што не може да се доведува во прашање избраниот претставник на српскиот народ.
Тој посочи дека врз основа на информацииите што ги има и понатаму смета дека главниот збор во преговорите со Косово ќе го води Берлин и дека во следниот месец очекува средба со германската канцеларка Ангела Меркел.
Вучиќ посочи дека приказните на Курти за геноцид се налудничави, како и тоа дека Косово ќе се вооружува и нагласи дека тоа нема да ја исплаши Србија.
„Нема ништо од тоа, вие работете си ја вашата работа, ние ќе си ја работиме нашата“, порача тој. Српскиот претседател додаде дека се гордее што во последните осум години Србија немала воени судири, туку петкратно помалку инциденти на национална основа.
„Наша цел е да обезбедиме мир и да ја градиме земјата“, истакна тој.
Прашан што значи системот на економски и политички реципроцитет, Вучиќ рече дека Курти мора да најде нешто што ќе му понуди на својот народ.
„Со принципот на реципроцитет тој сака да каже дека се држава еднакво како и Србија. Ние не можеме да воведуваме принципи на реципроцитет бидејќи не го сметаме Косово за држава. А се плашам дека тоа би било лошо за нив“, рече Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.