Регион
Голема акција на српската полиција и ФБИ: уапсени 11 лица, мамеле луѓе преку интернет и заработиле 70 милиони долари
Во соработка со надлежните судски тела на Србија и Сојузното биро за истраги на САД (ФБИ), по налог на Обвинителството за организиран криминал, претресени се станови на 16 локации во Србија и уапсени се 11 лица, државјани на Србија, Црна Гора, Австралија и на Филипини.
Сите уапсени се приведени по што ќе бидат сослушани во постапка на меѓународна правна помош што Србија им ја дава на надлежните судски тела на Соединетите Американски Држави, соопшти Обвинителството за организиран криминал.
Осомничено е дека уапсените како организирана криминална група од 2011 година до денес учествувале во создавање, промовирање и организирање најмалку 16 лажни инвестициски платформи користејќи интернет и онлајн веб-страници, со што добиле противправна имотна корист од над 70 милиони долари.
Групата пронаоѓала инвеститори во светот, вклучително и оние во Северниот округ на Тексас, кои инвестирале во лажни инвестициски платформи за бинарни опции, каде што членовите на групата создавале лажни трговски трансакции, лажни потврди за повлекување пари и лажни потврди за подигање пари, наведува Обвинителството.
Членовите на организираната криминална група, користејќи лажни идентитети и лажни титули, преку е-пошта или видеоконференциски врски ги упатувале инвеститорите да ги внесат своите инвестиции на меѓународни банкарски сметки поврзани со организаторот на групата.
По тоа, групата, по налог на организаторот, ги затворала лажните платформи за инвестирање и по некое време повторно отворала нови со истиот веќе развиен метод на работа.
На овој начин постои основано сомнение дека организаторот и членовите на оваа група добиле противправна имотна корист во висина над 70 милиони долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.