Регион
Грчките обвинители добија детали за 92 жртви од катастрофалните пожари
Листа од 92 жртви, вклучувајќи и две неидентификувани лица, од смртоносните пожари кои минатиот месец ја зафатија областа Атика, форензичарите ги испратија до обвинителите во Атина, како дел од истрагата по катастрофата.
Информациите ќе им помогнат на обвинителите при контактот и повикувањето на роднините на загинатите и другите преживеани во пожарите да дадат исказ со цел собирање докази.
ДНК-примероци се земени од двете неидентификувани останки, но нивните најблиски сè уште не дошле да ги идентификуваат.
92. жртва од пожарите беше 85-годишен маж, кој почина вчера во болница во Атина, со што бројот на жртвите од пожарот кои починале во болница се искачи на вкупно девет лица.
Обвинителите веќе слушнале сведоштва од 25 службеници, вклучувајќи ги и сегашните и претходните команданти на противпожарната.
Во меѓувреме, властите примиле 3 130 барања од луѓе и бизниси за добивање финансиска помош по катастрофата.
А како што соопштија властите, поединците треба да добијат паушална сума од 5 000 евра, додека бизнисите ќе добијат по 8 000 евра.
Општина Рафина вети дополнителни 587 евра за секоја жртва во пожарите.
Од вторникот, 1,95 милиони евра им се исплатени на 426 граѓани, додека сума од 184 000 евра им е исплатена на 27 компании.
Преживеаните, исто така, добиваат помош од единицата за мобилна поддршка обезбедена од Општина Атина.
Во раните утринските часови, како што објави грчки „Катимерини“, грчката противпожарна служба реагирала на пожар во областа Агиа Марина во Неа Макри во источна Атика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.