Регион
„Индекс“ објави снимка од односот на хрватската полиција кон мигрантите
Хрватскиот портал „Индекс“ објави видео на кое се прикажани хрватски полицајци без службени значки како одземаат мобилни телефони од мигранти во воз.
Порталот посочува дека одамна е познато оти полицијата е во лов по бегалци и илегални мигранти во целата земја.
Според хрватскиот портал, полицијата не се ни обидува премногу да го скрие тоа, како што се обидува да ги скрие нелегалните протерувања и тоа што не им се нуди азил на оние што можеби ќе сакаат да останат во Хрватска.
Организации кои се занимаваат со правата на бегалците и мигрантите сè повеќе укажуваат на докази дека хрватската полиција одзема мобилни телефони, пари и други вредни работи од мигрантите.
Видеото што го објавува „Индекс“ наводно е од полициска акција што се случила во воз на 17 јануари годинава на релација меѓу Сисак и Загреб. Снимката тајно ја направил еден од патниците во возот.
На видеото се гледа дека полицаец од мигрантите одзел три мобилни телефони, без никаков отпор од нивна страна бидејќи, како што наведува порталот, тие веќе се подготвени на таков однос од хрватската полиција.
„Сега само внимавај да не ти излезат од тука“, се слуша еден полицаец како му се обраќа на колегата, додека во рака ги држи запленетите телефони.
Патник од возот за „Индекс“ изјавил дека полицијата знаела колку мигранти биле во возот и точно каде да ги пронајде.
Според неговите зборови, полицијата се качила во возот кај станицата во Велика Горица, а машиновозачот ги затворил сите врати, освен оние на кои влегле полициските службеници.
„Еден мигрант не беше во вагонот во тој момент, па отидоа да го бараат“, изјавил неименуваниот патник.
Како што пишува „Индекс“, особено впечатливо на снимката, покрај одземањето на мобилните телефони од мигрантите, е тоа што полицајците имаат и нецелосна униформа, што е казниво со закон.
Во врска со овој настан од порталот побарале изјави од полицискиот оддел во Загреб, но како што наведуваат, од таму добиле непрецизен одговор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.