Регион
„Катимерини“: Грчкото знаме е причина за нови тензии меѓу Атина и Анкара
Надежите дека тензиите помеѓу Атина и Анкара можеби ќе стивнат по телефонскиот разговор помеѓу грчкиот премиер Алексис Ципрас и неговиот турски колега, Бинали Јилдирим, беа целосно скршени кога Турција се обиде повторно да го стави во прашање грчкиот суверенитетот во делови од Егејското Море, коментира грчкиот весник „Катимерини“.
Вчера, Јилдирим изјави дека турската крајбрежна стража отстранила грчко знаме од ненаселен остров во Егејското Море, чија припадност е спорна.
Јилдирим рече дека инцидентот е сличен на оној од 1996 година кога двата НАТО-сојузника завојувале поради ненаселениот остров Имија, т.е. Кардак на турски – за кого и Турција и Грција велат дека е нивен.
„Нашиот совет за Грција е да се воздржи од провокации и вознемирувања. Решени сме да дадеме соодветен одговор“, изјави Јилдирим.
Портпаролот на грчката влада, Димитрис Ѕанакопулос, сепак истакна дека нема докази за нарушувања и ги опиша тврдењата на Јилдирим како провокативни. Тој рече дека Грција никогаш нема да ја прифати територијата како неутрална зона ниту, пак, ќе остане настрана кога некој ќе го стави под сомнеж нејзиниот територијален суверенитет.
„Јилдирим треба да биде повнимателен. Ја повикуваме Турција да се врати на патот на меѓународното право“, истакна Цанакипулос додавајќи дека турските власти треба да преземант иницијатива за намалување на тензиите.
Истовремено, портпаролот на грчката влада увери дека тие ќе продолжат да го истражуваат случајот со знамето на мирен и сериозен начин.
Грчките медиуми напишаа дека три деца за време на велигденските празници пристигнале на островот и го поставиле грчкото знаме.
Турскиот весник „Хуриет“ напиша дека властите во Атина биле навреме известени дека тројца млади луѓе подигнале грчко знаме и имале доволно време за да реагираат. „Хуриет“ додава дека знамето било подигнато во петокот. Властите во Атина биле известени во саботата, но кога не презеле мерки, турските крајбрежни стражари биле испратени на местото за да го отстранат знамето.
Во 1996 година спорот за суверенитетот на островот Имија ги доведе двете страни на работ на војна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.