Регион
Критики до Трамп по изјавата за Црна Гора – „Трамп наседна на играта на Путин“
Сите ја сакаат Црна Гора без оглед на потешкотиите на Балканот во текот на изминатите години, изјави во видеоинтервју гувернерот на американската сојузна држава Мејн, Пол Лепејџ, по изјавата на Трамп дека Црногорците се агресивни луѓе.
„Црна Гора е пријател со сите, Мејн сака да биде партнер со Црна Гора“, истакна Лепејџ за време на посетата во Подгорица, се наведува на официјалниот сајт на американската амбасада во градот, ден по контроверзната изјава на претседателот на САД.
Критики на адреса на Трамп стигнаа и од републиканскиот сенатор Џон Мекејн, кој наведе дека црногорскиот народ храбро му се спротивставил на притисокот на Путин.
„Напаѓајќи ја Црна Гора и доведувајќи ги во прашање нашите обврски во НАТО, Трамп наседна на играта на Путин“, оцени Мекејн.
Поранешниот американскиот амбасадор во НАТО, Никола Бернс, рече дека Трамп со изјавата против Црна Гора покренал сомнеж оти САД би можеле да одбијат да им помогнат на сојузниците.
Вчера во интервју за „Фокс њуз“ Трамп ја доведе во прашање обврската на Соединетите Американски Држави да ги бранат членките на НАТО.
„Црна Гора е мала земја со многу силни луѓе. Тие се многу агресивни луѓе. Можеби ќе станат уште поагресивни и ви честитам – во трета светска војна сме. Тоа ми е сосема јасно , но така се поставени работите“, одговори Трамп на прашањето зошто САД би ја бранеле Црна Гора ако таму избие војна.
Трамп неодамна се закани дека ќе ги повлече САД од алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.