Регион
Лајчак: Можна е нормализација на односите меѓу Србија и Косово
Европската Унија е убедена дека сеопфатно нормализирање на односите меѓу Косово и Србија е апсолутно можно, тоа е во нивен интерес, во интерес на целиот регион и самата Унија, оцени специјалниот претставник на Европската Унија за дијалогот меѓу Белград и Приштина, Мирослав Лајчак.
Лајчак објасни дека ЕУ е медијатор во тој дијалог и, според него, таа не наметнува ништо, туку посредува во преговорите со цел да се најде заемно прифатливо решение за разните елементи на сеопфатниот договор за нормализација.
„Во право сте дека темата дискутирана од септември се однесува на меѓусебни финансиски побарувања и имотни проблеми. Ние веќе имавме три рунди дискусии на ниво на главни преговарачи минатата година, што им овозможи на страните да разменат мислења и одржавме воведни дискусии за ова многу сложено и чувствително прашање“, рече Лајчак.
„Подготвени сме да продолжиме веднаш штом новата влада во Приштина стапи на должност“, додаде тој.
Посочи дека ЕУ и САД имаат долга и продуктивна историја на тесна соработка на Западен Балкан и во процесот на нормализирање на односите меѓу Србија и Косово.
„Оваа соработка донесе опипливи позитивни резултати во последните години и јас сум во чест контакт со моите американски колеги, со цел да подготвиме заедничка стратегија и заеднички активности и со нетрпение очекуваме обнова на поблиска трансатлантска соработка“, истакна специјалниот претставник.
На прашањето кој треба да биде главниот елемент на договорот за сеопфатна нормализација, Лајчак објасни дека страните се договориле за главните елементи на договорот за сеопфатна нормализација во јули.
„Некои веќе ги знаете затоа што беа дискутирани или заклучени во текот на летото 2020 година. Другите ќе бидат дел од нашите идни разговори“, изјави Лајчак.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.