Регион
Осомничениот Киргиз ослободен од сомневањата за атентатот во Истанбул
Државјанинот на Киргистан, 28-годишниот Лакхе Машрапов, кој бил приведен и испитан по враќањето од Турција поради можна поврзаност со нападот врз ноќниот клуб во Истанбул на новогодишната ноќ, ослободен е од сомневањата, објавија во вторникот киргистанските медиуми.
Лакхе Машрапов се споменува во турските медиуми, кои се повикуваат на безбедносни извори, како можен осомничен во врска со нападот во клубот „Reinа“ во кој се убиени 39 луѓе, претежно странски туристи во текот на дочекот на Новата година.
„Државниот комитет за национална безбедност (ГКНБ) ја истражува можноста за вмешаноста на државјанина Киргистан во нападот во Истанбул. ГКНБ испрати барање во таа смисла на турските колеги. Службениците на ГКНБ го префрлија во регионалната канцеларија каде што е испитуван“, изјавил за медиумите портпаролот на киргистанската тајна служба.
Машрапов подоцна е пуштен на слобода и против него не е подигнато обвинение, објавија киргистанските медиуми повикувајќи се на ГКНБ.
Претходно во вторникот Машрапов во интервју за агенцијата АКИpress негираше дека е вмешан во нападот во Истанбул, а во вторникот отпатувал откако турската полиција кусо го испитувала бидејќи личел на мажот осомничен за нападот.
Киргистанското министерство за надворешни работи оцени дека „не е веројатно“ оти киргистански државјанин е вмешан во тој напад.
„Според прелиминарните податоци, таа информација не е веродостојна, но министерството сепак, прави натамошни проверки“, изјавил портпаролот на министерството.
Во вторникот вечерта, според агенцијата Dogan, двајца странци чијашто националност не е објавена, се уапсени на меѓународниот истанбулски аеродром „Ататурк“ на влегувањето на меѓународниот терминал за заминување и одведени се на испитување./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.