Регион
Преглед на состојбата во регионот: Албанија со нов рекорд на новозаразени, во Косово уште 13 починати
Преглед на состојбата со коронавирус во регионот во последното деноноќие.
Нов рекорд на новозаболени во Албанија
Откако Албанија вчера регистрираше рекордни 120 новозаразени, што е најмногу од почетокот на пандемијата, денеска забележан е нов рекорд. Имено, во последните 24 часа во земјата, потврдени се 123 нови случа, а починале пет пациенти, на возраст од 47 до 72 години, тројца од Скадар и двајца од Тирана.
Од последно потврдените нови случаи половина се од Тирана, каде се и половина од активните случаи или 1.285 лица.
Во Косово уште 13 починати и 245 заболени
Пораст на бројот на заболени и починати е регистриран и во Косово. Денеска во земјата има 245 новозаразени, што е за 9 повеќе од вчера, а зголемен е и бројот на смртни случаи од 10 на 13.
Вкупно, од почетокот на епидемијата, во земјата се регистрирани 8.799 заразени. Излекувани се 4.863 лица, а активно заразени се 3.687.
Србија со помалку случаи на новозаразени во споредба со вчера
Според најновите податоци во Србија уште осум пациенти ја загубиле битката со ковид-19.
Потврдени се 311 новозаразени, што е помалку од вчера кога имаше 330.
Голем пад на бројот на новозаразени во Бугарија во споредба до вчера
Во Бугарија во изминатите 24 часа се потврдени 146 нови случаи на коронавирус од извршени 3.955 тестови. Во земјата вчера беа потврдени 270 новозаболени.
Вкупниот број од почетокот на пандемијата е 11.836 лица, во моментот активни се 5.055 од случаите.
Хоспитализирани се вкупно 793 лица, од кои 43 во одделенија за интензивна нега. Излечени се 6.396 од кои 77 во последните 24 часа.
Две лица починаа, со што вкупниот број жртви достигна 385.
Во Грција 75 новозаболени
Грчките здравствени власти вечерва објавија 75 нови случаи на коронавирус и 2 смртни случаи во последните 24 часа.
Вкупниот број случаи се искачи на 4.662, со 208 смртни случаи.
Денешните податоци се помалку алармантни од вчерашните, кога беа регистрирани 110 новозаболени.
60 новозаразени во Црна Гора
Во последните 24 часа во Црна Гора биле потврдени 60 нови случаи на коронавирус врз основа на 431 тестирани примероци, а едно лице починало, соопшти Институтот за јавно здравје.
Половина од новозаразените се од Подгорица.
Вкупниот број на активни случаи во Црна Гора во моментов е 1.762 лица. Од почетокот на пандемијата, вкупниот број регистрирани случаи на инфекција со новиот коронавирус к 3.258.
Вкупниот број на смртни случаи поврзани со ковид-19 од почетокот на јуни е 42, а од почетокот на годината 51.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.