Регион
Русите ја вратија во БиХ иконата што им ја подари Додик
Руските власти ѝ ja предадоа на Амбасадата на Босна и Херцеговина во Москва иконата што претседателот на Претседателството на БиХ, Милорад Додик, му ја подари на рускиот министер за надворешни работи, Сергеј Лавров, по што се отворија низа прашања за нејзиното потекло, објавија медиумите во БиХ.
Амбасадорот на БиХ во Русија, Жељко Самарџија, рече дека во наредните денови ќе биде организирано префрлувањето на иконата во БиХ преку дипломатски канали.
Иконата со ликот на свети Никола, наводно позлатена и стара 300 години, Додик му ја подари на Лавров за време на неговата официјална посета на БиХ на 14 декември. Медиумите блиски до Додик обрнаа големо внимание на овој чин објавувајќи фотографија од задниот дел на иконата со восочен печат докажувајќи дека таа е регистрирана во Украина како уметничко дело. Круговите на Додик ширеа информации дека иконата е пронајдена во Луганск во делот на Украина кој е под контрола на проруските сепаратисти.
По избувнувањето на скандалот, бидејќи никој не понуди објаснување од каде потекнува иконата на Додик, Украина испрати дипломатска нота до БиХ, во која бара дополнителни информации. Самиот Додик немаше коментар за скандалот седум дена по што неговата канцеларија им понуди на медиумите тврдење дека таа не е украдена, туку станува збор за семејна сопственост. Тие не кажаа ништо за тоа како иконата, всушност, пристигнала во БиХ.
Ова појаснување само поттикна дополнителни прашања, кои повторно останаа неодговорени, но затоа канцеларијата на Додик денеска испрати дипломатска нота до украинската амбасада барајќи од земјата да докаже дека иконата е нејзин имот или културно богатство.
„Доколку Украина има докази дека станува збор за икона што е дел од украинското културно, религиозно и историско наследство, ве молиме, информирајте ја Амбасадата кому и во кое време му припаѓала иконата, дали е отуѓена, од кого, кога и каде и дали се наоѓа на која било листа на отуѓени предмети што ги бара Украина“, стои во белешката на Додик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.