Регион
Синот на убиената новинарка на Малта: Мајка ми го истражуваше и Ѓукановиќ
Синот на Дафне Каруанa Галиција рекол дека неговата мајка ја истражувала и врската на Мило Ѓукановиќ во случајот „Можура“.
Синот на новинарката, која пред три години беше убиена на Малта, Метју Каруана Галиција, рекол дека претседателот на Црна Гора бил клучна личност од оваа земја во истражувањето на неговата мајка додека таа пишувала за случајот „Можура“.
Тој во интервју за „Вијести“ навел дека неговата мајка ги испитувала врските меѓу Ѓукановиќ, премиерот на Малта Џозеф Мускат и владејачката елита во Азербејџан.
„Мајка ми истражувала што правеле официјални лица од Малта во Црна Гора. Особено активностите на Конрад Мици, Џозеф Мускат, Тицијано Масу, фирмата Виталс Глобал Хелкер и Рам Тумулури, како и фирмата СОЦАР во Црна Гора. Клучната личност која ја истражувала од Црна Гора бил Мило Ѓукановиќ како пандан на Мускат во таа земја“, рекол Галиција.
Објаснил дека Дафне го испитувала односот на Ѓукановиќ, Мускат и владејачката елита во Азербејџан, чија врска со официјални лица од Малта и претставници на Шангај електрик, компанија која ја контролира кинеската влада, како што рекол, веднаш предизвикало сомнеж.
Додал дека Универзал капитал банка е вмешана во сомнителни трансакции кои вклучувале луѓе, компании и банки од Црна Гора.
Според него, можноста сметката во Универзал капитал банка во Црна Гора да е користена како црн фонд за корупција во Европа, требало да го привлече вниманието на американското Министерство за финансии и Европската банкарска агенција.
Метју Галиција, кој, исто така, е новинар, по трагичниот настан го напуштил Меѓународниот конзорциум на истражувачки новинари и сосема се посветил на истражување на убиството на неговата мајка.
Со неговите татко и брат ја основал фондацијата „Дафне Каруана Галиција фондација“ со која сакаат да постигнат подобрување на владеење на правото во Малта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.