Регион
Првите дози на „спутник В“ од Торлак се очекуваат за 15 до 20 дена
Министерот без ресор во Владата на Србија, Ненад Поповиќ, изјави денес дека првите количини на вакцината „спутник В“ од „Торлак“ може да бидат готови за 15-20 дена.
Поповиќ за РТС изјави дека тимот од Србија вчера го прими целиот тим на рускиот Национален институт за епидемиологија и микробиологија „Гамалеја“, на чело со директорот, и дека им е врачен сертификат за производство на вакцината „спутник В“ на „Торлак“.
Според него, во престижниот руски институт е утврдено дека сè е сосем исто како кога се произведува вакцината во Русија.
„Тие признаа дека сме земја што успеа да го спроведе договореното и да ја заврши постапката во најкус можен рок. Контролирани се 18 параметри врз основа на кои е донесена одлуката“, рече Поповиќ.
Поповиќ најави дека во следните 10-15 дена, супстанцијата во специјална амбалажа ќе почне да пристигнува од Русија, и дека „Торлак“ ќе има од 10 до 15 дена да ја искористи таа супстанција.
Тој изјави дека на „Торлак“ треба да се произведат околу 100.000 вакцини, а првите дози може да се очекуваат за 15 до 20 дена.
„Вакцината од ‘Торлак’ ќе биде според светските стандарди“, потенцира Поповиќ.
Тој рече дека Владата на Србија и претседателот одлучиле да инвестираат 50 милиони евра во „Торлак“ во најсложената опрема, така што целиот производствен циклус ќе почне следната година, за да не се добиваат повеќе супстанции од Русија.
Тој повтори дека тоа немаше да се случи без договорот меѓу претседателите на Србија и Русија, Александар Вучиќ и Владимир Путин.
Рускиот национален институт за епидемиологија и микробиологија „Гамалеја“ го потврди квалитетот на вакцината произведена во „Торлак“ и одобри да се произведува во Србија.
Така, Србија е првата земја во Европа што ќе ја произведува таа вакцина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Атина прекриена со сахарска прашина, нереални сцени во градот
Атина и јужните делови на земјата повторно беа обвиени со сахарска прашина, со нијанси на жолта и портокалова боја што создава нереална атмосфера во градот.
Облаци од прашина, пренесени преку Средоземното Море од Северна Африка, го обвиле Акропол и другите знаменитости на Атина, пишува „АП“.
Силните јужни ветрови носеа прашина од Сахара, па во последните часови од денот грчката престолнина изгледаше како да е користен филтер за фотографирање, пренесува Euronews.
🚨🇬🇷
HAPPENING NOW
The sky is totally orange over Athens, Greece
— Alex Barnicoat (@mrbarnicoat) April 23, 2024
Во среда се прогнозира разведрување на небото со поместување на ветровите и поместување на прашината и опаѓање на температурите.
Дневниот максимум во делови од јужниот остров Крит надмина 30 степени Целзиусови, повеќе од 20 степени Целзиусови над она што беше забележано во поголемиот дел од северна Грција.
Корисниците на социјалната мрежа Икс објавија видеа од необична „портокалова“ појава од територијата на цела Атина.
Веста за Атина во „портокалово“ многу брзо се прошири низ светските медиуми, а видеата ги споделија и профили на социјалните мрежи кои се занимаваат со глобални актуелни вести.
Регион
Убиен работник од Украина во Славонски Брод
Во центарот на Славонски Брод во попладневните часови е пронајдено машко тело.
Полициската управа Брод-Посавина соопшти дека е приведено едно лице поврзано со инцидентот.
Се работи за млад градежен работник од Украина. Конфликт се случил во стан во центарот на градот каде што биле сместени работниците (родени во 90-тите).
Полицијата соопшти дека телото на мажот е пронајдено во куќата околу 15:17 часот и дека се води истрага, а потоа и кривична истрага која треба да ги расветли сите околности.
Регион
Таткото на осомничениот за убиството на Данка Илиќ го откажал полномошното на адвокатот
Небојша Живановиќ, адвокатот на Радослав Д., таткото на Дејан Д., кој е осомничен за убиството на двегодишното девојче Данка Илиќ, за Танјуг изјави дека неговиот клиент го откажал полномошното.
Радослав Д. е осомничен дека му помогнал на својот син да го премести телото на девојчето од депонијата на засега непозната локација.
Со оглед на тоа што го откажал полномошното на избраниот бранител, сега треба да му се определи бранител по службена должност на Радослав Д.
Биолошкиот брат на осомничениот Дејан Д., Далибор Д., почина на 7 април во Полициската станица во Бор, каде беше осомничен дека му помогнал на својот брат да го скрие телото на двегодишното девојче.
Двегодишната Данка Илиќ исчезна на 26 март во Бањско поле кај Бор, а полицијата по 10-дневна потрага и детални проверки и информации ги уапси Срѓан Ј. и Драган Д. од Бор, кои се осомничени дека го удриле девојчето со автомобил, а потоа нејзиното тело го ставиле во багажникот на автомобилот и го однеле на депонија.
Телото на девојчето се уште не е пронајдено.