Регион
Хрватски епидемиолог: Живееме како да нема вирус, Европа ни се чуди
Минатата сабота во Хрватска беше забележан рекорден број нови случаи на коронавирус (140), а во исто време се одржаа неколку настани во текот на викендот, на кои се собраа голем број луѓе.
Неколку илјади навивачи беа на „Максимир“ на фудбалското дерби помеѓу Динамо и Хајдук, од кои само неколкумина носеле маски, а Северина одржа концерт во Сплит, на кој се собраа повеќе од илјада луѓе. Хрватска, која многу бргу донесе строги мерки и воведе целосен карантин, еднакво бргу ги напушти сите забрани и стана многу либерална во однос на заштитата од вирусот.
Поради само една венчавка во Задар, на која се собраа повеќе од 300 луѓе, заразени се 23 лица, меѓу кои и вработени во општата болница во градот, како и вработени во службата за итна помош, а се дозна дека е заразена и државната секретарка од Министерството за наука и образование поради што целото Министерство, заедно со министерката Блаженка Дивјак, се упатени на тестирање и самоизолација.
Бранко Колариќ, специјалист епидемиолог од Институтот за јавно здравје „Д-р Андрија Штампар“, во разговор за „Индекс“ вели дека Хрватска треба да ги заостри мерките и да ги ограничи собирите, односно дека луѓето сами треба да се воздржат од организирање прослави.
„Треба да се ограничи собирањето повеќе од 100 луѓе. Овие концерти, спортски настани и свадби, на кои се собираат голем број луѓе, секако не се добри за епидемиолошката состојба. Би сакал да апелирам луѓето да се воздржат од толку големи собири и прослави“, изјави епидемиологот.
„До пред 2 седмици се однесувавме како никогаш да не имало епидемија и тоа не беше добро. Од тогаш бројот на новозаразени лица почна нагло да се зголемува, а некои луѓе изразуваат гнев поради воведувањето нови мерки. Мерките служат за намалување на инфекциите и спречување на потребата од построг режим. Ќе мораме да се навикнеме да живееме заедно со оваа болест, што е заедничка одговорност на сите граѓани. Можам да кажам дека повеќето европски земји се изненадени од Хрватска и од фактот дека овде се живее како пандемијата да поминала. Сведоци сме на ширење на инфекцијата со локален пренос, а тоа е тешко да се стави под контрола за неколку дена“, објаснува доктор Колариќ.
Тој наведува дека општеството нема друг избор, освен граѓаните строго да се придржуваат кон мерките со цел да се спречи ширење на вирусот.
Според информациите на здравствените власти, во Хрватска денеска се регистрирани 92 нови случаи на инфекција со коронавирус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Регион
Словенечката опозиција бара истрага за случаите со крадење бебиња во Југославија: „Можеби се продадени повеќе од 20.000 деца“
Опозициските партии во Словенија поднесоа барање за парламентарна истрага за потенцијалното учество и одговорност на јавните службеници во случаите на кражба на деца во таа земја во периодот од 1965 до 1991 година, изјави денеска пратеничката на Словенечката демократска партија (СДС) Аленка Јерај.
„Во таканаречената трговија со бебиња, којашто се случуваше воглавно во 70те и 80те години во поранешна Југославија, повеќе од 20.000 деца можеби се продадени“, рече Јерај и додаде дека се соработува со српските друштва за овие случаи, пренесе СТА.
Овој проблем минатата година словенечкото здружение на родители на украдени деца го презентираше до собраниската Комисија за претставки, човекови права и еднакви можности со пропратна документација, а министерката за внатрешни работи Татјана Бобнар тогаш вети дека надлежните служби ќе направат се во нивната моќ.
Јерај изјави дека надлежните не презеле ништо, наведувајќи дека медицинскиот персонал инволвиран во неколку случаи на кражба на бебиња не бил вклучен во полициската истрага, а полицијата не ја презела документацијата од здружението на родители.
Словенечкиот премиер Роберт Голоб претходно оваа недела истакна дека 45 од 59 случаи на сомнителни кражби на бебиња се веќе затворени.