Регион
Црногорските трговци бараат да се работи во недела
Одборот на трговското здружение на Стопанската комора на Црна Гора побара на трговците да им се дозволи да работат во недела, пренесува Investitor.me.
Стопанската комора на Црна Гора изјави дека трговците побарале од ресорното министерство да го укине членот на Законот за внатрешна трговија, кој се однесува на неработната недела.
Тие тоа го побараа со цел да се зачуваат работните места, да се зголеми прометот, стопанската активност, економскиот раст, да се санираат последиците од економската криза и да се подготват за туристичката сезона.
Трговците бараат Уставниот суд да донесе одлука за иницијативата за процена на утврдување на членот од законот што се однесува на неработната недела, што ја поднесоа пред повеќе од 18 месеци.
Доколку нема подготвеност од државните органи да го укинат тој член, трговците предложија да може да се работи 26 недели годишно, за време на летната и зимската туристичка сезона, околу новогодишните празници и одморите.
Алтернативно, велат тие, потребно е да им се овозможи на економските субјекти од трговскиот сектор да работат во недела во една смена на ниво на цела година или барем во текот на летната сезона.
Одборот минатата година го усвои извештајот за работа и информации за работењето на трговскиот сектор, во кој се наведува дека остварениот промет во трговијата на мало по тековни цени е помал за 16,8 проценти во споредба со 2019 година.
Тие исто така наведуваат дека трговскиот сектор бележи значителен пад на бројот на вработени и дека во 2020 година имало околу 5.000 работници помалку, што е пад од 12,3 проценти во споредба со 2019 година кога во секторот биле вработени во просек 39.834 работници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ во ОН: Курти денес не е во Њујорк оти води тајна кампања во Северна Македонија
За време на седницата на Советот за безбедност на Обединетите нации посветена на шестмесечниот извештај на генералниот секретар на ОН Антонио Гутереш за работата на УНМИК, српскиот претседател Александар Вучиќ го обвини лидерот на движењето Самоопределување, Аљбин Курти за мешање во внатрешните работи на Македонија.
Вучиќ истакна дека Курти не бил присутен на седницата во Њујорк бидејќи бил зафатен со водењето на изборната кампања на неговата партија во соседна држава.
Вучиќ изрази изненаденост од тоа што, според него, најпопуларен политичар во Македонија е претседателот на Србија, иако нема кампања во таа земја.
Тој посочи дека како претседател на Србија се извинува за постапките на, како што го нарече, српскиот граѓанин Аљбин Курти и истакна дека мешањето во внатрешните работи на Северна Македонија не е политика на Србија, туку постапка на неодговорен граѓанин.
Регион
Уапсена државјанка на Јужна Африка, осомничена дека ја убилa мајка си во Црна Гора
Јужноафриканска државјанка е уапсена под сомнение дека утрово ја убила својата мајка во Пераст.
Полициската управа соопшти дека медицинскиот персонал на Здравствениот дом во Котор пријавил во полиција дека во станбена зграда во Пераст е пронајдено безживотно тело на жена, а таму била пронајдена и нејзината ќерка Н.Л.Т., пренесува Вијести.
„Полицијата излезе на местото на настанот каде е утврден идентитетот на починатата, а преземени се мерки и дејствија за утврдување на фактите и околностите под кои настапила смртта“, се вели во соопштението на полицијата.
Оттаму додаваат дека увид на лице место е извршено во присуство на обвинител од Вишото државно обвинителство во Подгорица, како и службеник од Центарот за судска медицина.
„По преземени сеопфатни истражни дејствија, припадниците на полицијата дошле до сомнение дека сторител на ова кривично дело е Н.Л.Т. и таа е лишена од слободата.
Регион
Османи: Белград ја спречува интеграцијата на Србите во институциите на Косово
Косовската претседателка Вјоса Османи упати низа обвинувања за Србија на седницата на Советот за безбедност (СБ) на Обединетите Нации (ОН) посветена на Косово.
Османи обвини дека Белград ја спречува интеграцијата на Србите во институциите на Косово.
Таа изјави дека Србија ја заплашува српската заедница на северот на Косово, а како пример го наведе неодамнешното апсење на косовски полицајци во Србија, пренесува „Радио Слободна Европа“.
Османи обвини и оти Србија претходните денови на граница задржувала автобуси со патници од албанска националност.
Владата на Косово претходно овие постапки ги оцени како одмазда на Србија за поддршката дадена од Парламентарното собрание на Советот на Европа за членството на Косово во оваа организација.
„Србите во Косово се под притисок, но од страна на властите во Србија“, рече Османи.