Регион
Шварц-Шилинг: Квинтата ризикува хаос во БиХ
Поранешниот висок претставник во БиХ, Кристијан Шварц-Шилинг, смета дека амбасадорите од земјите на квинтата (петорката) би требало веднаш да се состанат и да донесат соодветни мерки за да извршат притисок парламентот на Република Српска да ги повлече заклучоците во врска со учеството на претставикот на РС во заедничките институции на БиХ, пренесува сараевскиот портал „Кликс“.
Тој смета дека меѓународната заедница, предводена од земјите на квинтата (САД, Велика Британија, Франција, Италија и Германија), би требало веднаш да реагира.
„Мислам дека конечно е потребна одлучна и ефикасна реакција. Отсекогаш предупредував дека Додик сериозно мисли во врска со тоа што го изјавува и дека тоа не може да се зема здраво за готово. Овие заклучоци на НСРС се резултат на тоа што претходно не се реагирало кога Додик носел некои слични заклучоци“, вели Шварц-Шилинг.
Германскиот политичар тврди дека со усвоените заклучоци на НСРС се дерогираат државата и Уставот на БиХ. Прашан како би требало да изгледа реакцијата на меѓународната заедница, Шварц-Шилинг вели дека механизмите се познати.
„Америка веќе демонстрира како оди тоа воведувајќи санкции кога станува збор за Додик, кој е на црната листа. За жал, ЕУ го пушта да прави што сака. Сега навистина мора да се постапи одлучно кон РС да ги повлече овие заклучоци, кои, ако се толерираат, ќе имате почеток на хаосот со уште поопасен развој на настаните во БиХ“, предупредува тој.
Според Шварц-Шилинг, ОХР, правно гледајќи, може и сам да реагира, но земајќи ги предвид околностите и развојот на настаните, тоа би морало да го направи управниот одбор на Советот за имплементација на мирот. НСРС усвои заклучоци според кои, меѓу другото, претставниците на РС во инстутциите на БиХ се обврзуваат да го прекинат донесувањето какви било одлуки во органите на БиХ до усвојување на законот за престанок на мандатот на странските судии во Уставниот суд на БиХ и до неговото стапување во сила.
Освен тоа, сите институции на РС се обврзуваат да не прифаќаат и спроведуваат никакви идни антидејтонски и недемократски одлуки на високиот претставник и на Уставниот суд на БиХ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.