Регион
Шпанскиот премиер: Ја поддржуваме Србија кога станува збор за Косово
Шпанија го поддржува пристапувањето на Србија во Европската унија, а во однос на Косово, верува во потребата од почитување на меѓународното право и територијалниот интегритет и суверенитет на Србија, изјави во Белград шпанскиот премиер Педро Санчез.
Србија има пријател во Шпанија кој ќе и помогне да стане дел од Европската унија, изјави Санчез по разговорот со српскиот претседател Александар Вучиќ.
Социјалистот Санчез ја започна својата балканска турнеја во Белград и е првиот премиер на Шпанија кој ќе ги посети Србија, Црна Гора, Северна Македонија, Албанија и Босна и Херцеговина, каде од 1997 до 1999 година беше шеф на канцеларијата на високиот претставник на ОН, Карлос Вестендорп.
„Го поддржуваме процесот на проширување на Европската унија бидејќи Западен Балкан е дел од Европа и треба да стане дел од нашата заедница. Не се сомневајте дека Шпанија ќе го поддржи вашето членство во Унијата“, рече Санчез на заедничката прес-конференција со Вучиќ.
Тој посочи дека Србија и Шпанија ги поврзува „потребата да се почитува меѓународното право и територијалниот интегритет и суверенитет“.
„Ја поддржуваме Србија кога станува збор за Косово. Шпанија беше и секогаш ќе биде со Србија во одбрана на тие принципи“, рече Санчез.
Шпанија е една од петте членки на Европската унија која не ја признава независноста на Косово и самата е соочена со напори за независност на својата покраина Каталонија. Од 30 јуни 2023 година Мадрид го презема шестмесечното претседавање со Европската унија, а како што соопшти кабинетот на Санчез, тој ќе побара од земјите од Западен Балкан на турнејата да ги спроведат реформите што ги бара Брисел.
По дводневната посета на Србија, Санчез ќе отпатува за Босна и Херцеговина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Регион
Во Црна Гора 79 отсто од граѓаните се за влез во ЕУ: осум отсто повеќе од 2022 година
Доколку денеска би се одржал референдум за влез на Црна Гора во Европската Унија, за влез би гласале 79 отсто од граѓаните, што е осум отсто повеќе од 2022 година, покажува истражувањето спроведено од 2 февруари до 4 март годинава за потребите на Центарот за истражување на Меѓународниот републикански институт, објави РТЦГ.
Осум проценти би биле против влез, што е за три помалку од две години порано. На референдум не би излегле 10 отсто од испитаниците, два помалку од 2022. Три отсто од нив немале одговор.
На прашањето дали ЕУ е сериозна да им понуди членство на земјите од Западен Балкан, позитивно размислуваат 59 отсто од испитаниците, додека 28 отсто сметаат дека Брисел не е сериозен во таа намера. 13 отсто од нив немале одговор.
На прашањето каков треба да биде надворешнополитичкиот курс на земјата, 36 отсто од испитаниците одговориле дека тој треба да биде проевропски и прозападен. Од друга страна, само три проценти би сакале курсот на Црна Гора да биде проруски. 22 отсто од нив одговориле дека подеднакво треба да се свртат кон Запад и кон Русија. 17 отсто од нив би сакале курсот на Црна Гора да биде проруски, но и да ги одржува односите со ЕУ и Западот. Осум отсто од нив немале одговор.
На прашањето која земја ја сметате за најважен сојузник за вашата земја, 32 отсто од испитаниците сметаат дека тоа е Србија, а 20 отсто се изјасниле за САД. Девет отсто се определиле за Русија, шест за Турција и три за Кина. Седум отсто од нив немале одговор.
На прашањето која земја ја сметате за закана, 19 отсто од испитаниците ги навеле САД, додека 17 отсто мислеле на Русија. Србија ја споменале 10 отсто од испитаниците, Албанија осум, а Косово седум. 11 отсто од нив немале одговор.